4577/2025-2026

Lawngtlai, 24th February 2026: Vawiin khan Lawngtlai Bawrhsap Pu Donny Lalruatsanga chuan CEM, LADC Pu C. Lalsawmzuala chu a Office Chamber-ah tlawhin Lawngtlai District hmasawnna tur kawng hrang hrang a sawipui.

Pu Donny Lalruatsanga chuan Lawngtlai District-hmasawn nan LADC leh District Administration pheikhairual taka kal a pawimawh hle tih a sawi a. Hemi kawngah hian harsatna te in hrilh tlang a, hmalam pana ke pen tlan a tul hle a ni, a ti. LADC - ah sawrkar mumal tak a awm thei chu lawmawm a tih thu tarlangin Pu Donny Lalruatsanga chuan hmalam hunah tha taka thawhhona a awm a beisei tih a sawi bawk.

Pu C. Lalsawmzuala chuan DC - in a lo tlawh chu lawmawm a tih thu a sawi a. LADC leh District Administration - thawhhona chu thil pawimawh tak a ni a ti a. Lawngtlai District hmasawnna turin mahni thuneihna zawnah chak tak hmalak tlan a duh thu a tarlang a.CEM chuan Lawngtlai District- mipuite tha taka sawrkar tawiawm zel turin a sawm nghal bawk a ni.

Vawiin DC leh CEM inkawmnaah hian thu pawimawh tak tak sawidun a ni a. Faina leh thianghlimna kawngah leh khawpui cheimawi kawngah hmalak a ngai hle an ti a, hemi kawngah hian theihtawpa thawhho ni se an ti a. Motor parking leh traffic chungchaah hmalakna tha zawk awm se tih a ni a, ruahmanna siam ho ni se an ti a ni. Ran khuahkhirh kawngah hmasawnna tur tam tak a la awm tih pawm tlangin, khauh zawka dan leh thupek kenkawh ni se an ti a ni. Foreigner- lo lut thin leh sumdawnna kalpui chungchangah inkhuahkhirhna tha zawk bakah SOP mumal taka siama chak zawka hmalak ni se an ti a ni. Hemi kawngah hian FMR chu khauh taka kenkawh ni se an ti a ni.

DC leh CEM inkawmnaah hian Executive Secretary, LADC, Transport Officer, LADC, Sanitation & Waste Management Officer, LADC leh MJA aiawhte an tel thei a ni.