Central Young Lai Association (CYLA) hnuaia YLA branch hrang hrangte football leh volleyball hmanga an inelna tur, 2nd NECS Lai Cup 2019 chu vawiin khan Lawngtlaia Central YLA Playground-ah Lawngtlai Bawrhsap Pi Shashanka Ala, IAS chuan a chhuih hawng.

Pi Shashanka Ala chuan CYLA-in thalaite hmakhua ngaia NECS Lai Cup 2019 an buatsaih leh thei chu lawmawm a tih thu sawiin, infiam mi tha tak tak chher chhuahna hmanrua a nih ngei a beisei thu a sawi a. Ruihhlo vanga thalaite nun chhe mek leh ram hma hun derthawng taka awm mek chu infiamna hmanga thalaite hun awl hnawh khahna siamsakin la ven leh siam that theih a ni tiin, infiam mi fuan khawmte chu ruihhlo laka inthiar fihlim a, an nun uluk tur leh District chhung tournament khelha duh tawk mai lo va, a aia sanga inhlan kai tum zel turin a chah.

NECS Lai Cup tum hnihna hawnna hun hi CYLA Assistant General Secretary Pu Joseph Lalhmingthanga'n a kaihruai a. CYLA Adviser Pu Thathluna Chinzah chuan hunserh hmangin, General Secretary Pu Jh Lalrindika'n NECS Lai Cup chungchang report a pe a. Zaithiamte zai ngaihthlak niin, lam hmuhnawm tak thlir ho a ni bawk a. CYLA Treasurer Pu C. Hrangthianga'n lawm thu sawiin, Lawngtlai Bethel Veng Branch leh Vawmbuk Branch te'n 2nd NECS Lai Cup 2019 football match hmasa ber an khel zui nghal a ni.

CYLA GS report-a a lan danin NECS Lai Cup hi kum 2018 khan Pu Robert Romawia Royte hma lakpuinain bul tan a ni a. Kum 2019 hian a tum hnihna buatsaih chhunzawm leh niin, NECS TT Royte Group atangin Rs nuai 6.3 vel, Lawngtlai DC atangin Rs nuai 5 bakah, sum leh pai leh tha leh zunga tanpuitu hrang hrangte atangin he tournament buatsaih theih nan hian tanpuina a lut a ni.

2nd NECS Lai Cup-ah hian football (mipa)-ah YLA branch 37 leh volleyball (hmeichhia)-ah branch 10 an tel dawn a. Lawngtlai District Football Association (LDFA) leh Lawngtlai District Volleyball Association (LDVA) te nen tang hova ruahmanna siam a ni a. Football-a champion hian cheng nuai khat (Rs 1,00,000/-) leh trophy leh certificate dawngin, pahnihnain cheng sing nga (Rs 50,000/-) leh certificate an dawng ang a, lawmman tesep dang siam a ni bawk ang. Volleyball-a champion-in cheng sing thum (Rs 30,000/-) leh trophy leh certificate dawngin, pahnihnain cheng sing khat (Rs 10,000/-) leh certificate an dawng ang a, lawmman tesep dang siam a ni bawk ang.

Vawiina 2nd NECS Lai Cup 2019 hawnnaah hian LADC-a member-te, state sawrkar leh LADC hnuaia officer-te, MJA, VC Association leh tlawmngai pawl hrang hrang hruaitute, tournament khel tur branch hrang hrang leh zirlai naupangte bakah, Lawngtlai mipui thahnem tak an fuan khawm a ni.