Kumin April thlaa Chakma Autonomous District Council (CADC) inthlanpui neih zawh taka chuhtu awm lova tlinga puan Pu Kali Kumar Tongchangya chu, a khingpuipain High Court-a a khinna Court-in a hnawl hnuah vawiin khan Lawngtlai Bawrhsap Pu N. Chakhai MCS chuan rinawmna thu tiamtirin Member of District Council (MDC) atan a la lut.

He thubuai chungchanga Gauhati High Court, Aizawl Bench thu tlukna hriat a nih hnuah State Election Commission chuan Lawngtlai Bawrhsap chu CADC (CCB) Rules, 2002-in a sawi anga member lak luhna hi a hma thei ang bera buatsaih turin a ti a. Bawrhsap Pu N. Chakhai chuan nimin tlai khan CADC hmunpui Kamalanagar (Chawngte 'C') pan nghalin, vawiin chawhma dar 10 khan member thar lak luh inkhawm hi buatsaih nghal a ni.

April thla inthlanpuiah khan Fultuli biala MDC chuhtu pakhat zawk Pu Sumir Tongchangya'n inthlan chuh tura a hming pek luh thlawptu (seconder) atan sawrkar hna thawk (CADC hnuaia hna thawk) a hman avangin he inthlana Returning Officer chuan inthlan a chuhna chu pawm lovin, Pu Kali Kumar Tongchangya chu chuhtu awm lova tlingah a puang a. Hei hi Pu Sumir Tongchangya chuan Gauhati High Court, Aizawl Bench-ah khing letin, Court chuan April ni 10, 2018 khan RO thu tlukna chu stay order a chhuah hnan a. June ni 19, 2018 khan he thubuai hi ngaihtuah a ni a, June ni 22 khan Court chuan a stay order chu sutin, he khinna pawh hi a hnawl ta a ni.

Heti hian CADC-a MDC seat 20 awmah Congress chuan member 7 an nei ta a. MNF chuan member 8 neiin, BJP-in member 5 an nei ve bawk.