Lawngtlai, Mimkut thla ni 21, 2020: Vawiin chawhnu khan Lawngtlai Bawrhsap Dr Andrew H. Vanlaldika chuan Lawngtlaia thu thar la khawmtute kawmin, COVID-19 dona kawnga Lawngtlai District hma lakna hrang hrang a sawipui.

Lawngtlai Bawrhsap chuan September ni 19 leh ni 20-a District Hospital Lawngtlai TrueNAT Laboratory-a swab sample test atangin Lawngtlaia 71 RCC (Road Construction Company) Camp-a Border Roads Organisation (BRO) mi leh sa khung hran laite zingah COVID-19 positive paruk (6) hmuh chhuah an nih thu sawiin, he'ng mite hi anmahniah hri vei lan chhuahna (symptom) a awm loh thu leh hriat chhuah an nih veleh quarantine centre atanga Lawngtlai Covid Care Centre-a sawn luh nghal vek an nih thu a sawi a. Hri kai hmuh chhuahte hi khung hran lai zel an la nih avangin District mipuite chu chi-ai lo tur leh hri laka an him theih nana sawrkarin tih tur a tih leh inkaihhruaina a zamte chu tha taka zawm turin a chah nawn leh a ni.

Bawrhsapin thu thar la khawmtute a kawmnaah hian COVID-19 dona kawnga Lawngtlai District dinhmun kawng hrang hrangin sawi ho a ni a. COVID-19 laka himna tura fimkhurna dan hrang hrangte chu mipuiin hre thawkhat tawh viau mah se, uar zawk leh zau zawka inzirtir chhunzawm zel a la tul thu tar lan a ni a. Hemi kawnga hma lak dan turte sawi ho nghal a ni.

Tun dinhmunah Lawngtlai District-ah COVID-19 positive 40 hmuh chhuah tawh niin, an zinga mi 30 chu dam takin chhuahtir an ni tawh a. Enkawl lai 10 zinga 1 chu ZMC-ah enkawl niin, a bak mi 9 chu Lawngtlai CCC-ah dah an ni thung.