April ni 2, 2020 khan Lawngtlai Bawrhsap, District Disaster Management Authority Chairman ni bawk Pi Shashanka Ala, IAS chuan Disaster Management Act 2005 section 30-na leh The Mizoram Epidemic Diseases (COVID-19) Regulations, 2020 section 11-nain thu neihna a pek angin COVID-19 hri leng mek chungchangah a hnuaia mi ang hian Lawngtlai District chhunga hman turin thupek thar a chhuah.
1. Mipui hnena thu puanzar tur COVID-19 kaihhnawih reng reng ziakin emaw, WhatsApp leh text message kal tlangin emaw, veng chhung information centre kal tlangin emaw pawh ni se, District Level Task Force (DLTF) phalna emaw, hriatpuina emaw lak hmasak phawt loh chuan thu eng mah mipui hnena tlangzarh tur a ni lo vang. Thu chhuah tur reng reng DLTF phalna/hriatpuina lak phawt hnuah bialtu incident commander-te leh village level task force (VLTF)-te hriattir a nih hnuah chauh puanzar thin tur a ni ang.
2. A tel lova kan awm theih loh bungrua (essential commodities) phur motor-te hi Thingkah Screening Point-ah en fiah a ni ang a, a tul dan angin 'vehicle pass' pek a ni ang. Thingkah Screening Point duty-te'n 'vehicle pass' an pek tawh chu an kalna tur an thlen hma loh chuan khawiah mah lo tihdin tawh tur a ni lo vang.
3. Essential commodities bungraw phur motor-te an tum ram an thlen hma hauhvin hmun thenkhatah chuan lo tidingin an bungraw phurhte hi an lo leisak mai thin a ni tih hmuh chhuah a ni a. Hei hi tih tawh loh tur a ni ang. Tun ang hunah hian bungruate hi kan mamawh ang thovin hmun dangah pawh mamawh a ni a, mi dang chan tur lo lak pensak mai hi tih tawh loh tawp tur a ni.
4. Lawngtlai town area bikah hian hmun 4-ah barricade point siam a ni a, chu'ngte chu:
a. Thingkah Screening Point
b. Forest Checkgate, Lawngtlai-Diltlang-Parva Road
c. 71 RCC
d. Council Veng
He'ng barricade point-ah te hian lirthei (essential commodities phurtu ni lo) vehicle pass an en dik ang. He'ng barricade point-ah te hian VLTF member 2 leh police 1 theuh duty dah a ni ang.
He'ng barricade point duty ni lo, veng chhung hmun hrang hranga duty-te chuan vehicle pass hi an tiding/endik tawh tur a ni lo vang a, mipui nawlpui pawn chhuah leh chhuah loh/pawn chhuah dan te an endik thung ang.
5. District administration lam atangin Pu Hmingmawizuala, Executive Magistrate chu Areopagy-ah station a ni ang a, Lawngtlai District tana essential commodities phur motor in-unload tur reng reng a hnenah an in-report phawt tur a ni ang a, a hriatpuina leh enpuina lovin eng motor mah an in-unload tur a ni lo vang.
A chunga thupekte khi mipuite that tlanna tura duan a ni a, chu vangin, Lawngtlai District mipuite zawm theuh tura ngen leh hriattir an ni. Zawm lo an awm a, man an nih chuan an chungah dan anga action lak a ni ang.
Attachment
- Loading attachment...
