Vawiin khan Lawngtlai Bawrhsap Dr Arun T., IAS chuan Lawngtlai District Hospital a tlawh a. Hospital hna thawh dan hrang hrang leh Kayakalp Award 2017 atana an inbuatsaihna te a en fiah.

Bawrhsap hi Lawngtlai District Medical Superintendent Dr Lalmalsawmi Hmar hovin thawktute’n an lo dawngsawng a. District Hospital building leh room hrang hrangte fanpuiin, bungrua, khawl leh hna thawktute dinhmun tlangpui an enpui a. Hospital tihchangtlun nan leh District tana chhawrnahawm zawk a nih theih nana an mamawh hrang hrangte a hnenah hian an lo thlen a ni.

Lawngtlai DC chuan District Hospital chu a tum aia a hmuh that zawk thu leh thawktute inpekna hmuh theiha lang chhuak chu lawmawm a tih thu a sawi a. Kayakalp Award 2017 dawng tura an inbuatsaih dan leh an hma lakna hrang hrang chu fakawm a tih thu sawiin, lawman dawng tlaka an thawk nia a hriat thu leh pakhatna an nih ngei pawh a beisei thu a sawi a. Hma lam hun zelah hriselna kawnga District-in hma a sawn theih nan theih tawp chhuaha ngaihven zui zel a tum thu leh an mamawh hrang hrang an sawi te pawh a theih anga bawhzuipui a tum thu a sawi bawk.

Lawngtlai DMS Dr Lalmalsawmi Hmar chuan Kayakalp Award 2017 dawng tura thawktute inpekzia leh Lawngtlai mipui, sawrkar department leh pawl hrang hrangte tawiawmna an dawn that thu sawiin, an inbuatsaihna avanga hmuh theiha Hospital-in hma a sawn chu lawmawm a tih thu a sawi a. Damdawi ina hna thawh danin hma a sawn bakah, damlote paw’n an pan tam phah thu sawiin, khum 30 lek awm chu a rang lama room zauhva tihpun an mamawh thu a sawi a. Sawrkarin doctor tha tak tak a pek belh leh NEDP leh scheme dang atanga khawl tha tak tak an nei thar chu an lawm thu a sawi rualin, department leh programme hrang hranga nurse indaih lohna chu an harsatna a nih thu a sawi bawk.

Damdawi in fai inelna ‘Kayakalp Award 2017’ atan hian Lawngtlai District Hospital hian internal assessment leh peer assessment pal tlang tawhin, tunah hian inelna hnuhnung ber (external assessment) atan an inbuatsaih leh mek a ni.