Vawiin khan Mizoram Journalists’ Association (MJA), Lawngtlai District chuan Lawngtlai Press Club-ah Annual Conference 2021 an hmang a. Lawngtlai Bawrhsap Dr Andrew H. Vanlaldika, District MJA Patron ni bawk chuan Khuallian niin a hmanpui.

Khuallian Dr Andrew H. Vanlaldika chuan COVID-19 hri leng chungchang leh ram hmasawnna atana sawrkar tawiawmna kawngah Lawngtlai District MJA te chu fakawm a tih thu sawiin, journalist nihphung dik tak chhawm nun zel tum turin a chah a. Thenawm ram, Myanmar buaina avangin mahni sahimna zawnga Lawngtlai District-a lo lut an awm theih chungchangah sawrkar chuan ngun takin a ngaihven reng tih sawiin, thuthang dik lo hmeh mih kawngah chanchinbu mite thawhpuina a ngen nghal a, social media-a thu theh darh kawngah chanchinbu mite chu mi dang zirtirtu pawimawh an nihna lantir zel turin a chah bawk.

He hun hmanpuitu MJA General Headquarters President Pu Zonunsanga Khiangte chuan Mizoram journalist-te chuan an hma zawnah ram hmasawn nan an thawk rim hle tih sawiin, sawrkar tan pawh kutke tangkai tak an ni, a ti a. Sawrkar hma lakna hna thawh a hmuna tlawh (project site visit) chu sawrkar hma lakna tihchak nan leh a kal dik lo tur khalh ngil nan thil tangkai tak a nih avangin uar deuh deuh turin journalist kal khawmte chu a chah a ni.

District MJA President Pu Lalngheta Ralte pawhin journalist-te chu ram hmasawn nana hman tangkai theih leh hman tangkai tlaka awm a pawimawh tih sawiin, sawrkar department-te pawhin advertisement hmanga mipuite hriat tur pawimawh puanzar nan tun aia nasain chanchinbu an hman tangkai a tul a ni, a ti.

Vawiina MJA Lawngtlai District Annual Conference hi District MJA Vice President Pu Elvis Lalthangzuala'n a kaihruai a. Executive Committee Member Pu ZD Dengngura'n hunserh hmangin, General Secretary leh Treasurer te hnen atangin report ngaihthlak a ni a. MJA member thar Pu Israel Lalnghilhlova, DDK Stringer, Siachangkawn chu District President-in a lawm lut bawk.

Lawngtlai District MJA Annual Conference hi Lawngtlai DIPRO Pu C. Lalhruaitluanga leh LADC-a I&PR Department hotute bakah, MJA General Headquarters atangin President Pu Zonunsanga Khiangte, Treasurer Pu C. Lalhmachhuana  leh Library Committee Secretary Pu PB Lalrammawia te'n an hmanpui a ni.