No.496/2020-2021

COVID-19 vanga inkharkhip thawh hnihna kalpui meka Lawngtlai District huam chhunga in sak, retaining wall siam, kawng laih leh hna dang thawh ngaite'n phalna an lak dan tur chungchangah vawiin khan Lawngtlai Bawrhsap & District Disaster Management Authority Chairman Pi Shashanka Ala, IAS chuan heti ang hian thupek a chhuah.

1. In sak leh retaining wall, etc. siam tumte chuan an in sakna tur/retaining wall, etc. siamna tur awmna veng VLTF-te hnenah ziakin an hriattir tur a ni ang. VLTF-te chuan an dilna chu khawn khawmin, a hmunah ngei an endik (verify)-sak tur a ni ang a. Tul bik tak tak, sak/siam chhunzawm lohva anmahni/mi dang tana hlauhawm theite chauh 'recommend-na' an siam sak ang a, chu'ngte chu VLTF-te chuan bialtu Incident Commander-te theuh hnenah an theh lut ang a, Incident Commander-te'n DC Lawngtlai hnenah an hlan chhawng leh ang. Heti ang dilna hi VLTF-te'n a hlawmin ni 25.04.2020 aia tlai lovah Incident Commander-te hnenah an theh lut tur a ni ang.

He thilah hian tul bik tak tak lo chu recommend loh tur a ni a, induhsak vanga recommend-na lo pek maite tih loh tawp tur a ni. Hei hian company leh private contractor-te erawh a huam lo vang.

2. In sak leh retaining wall, etc. siam phalna hi VLTF-te'n an pe thei lo va, dilna verify hnuah an recommend thei chauh zawk a ni. Phalna chu DC Lawngtlai chauhvin a pe ang.

3. Company leh private contractor-te erawh chuan phalna hi DC Lawngtlai hnenah an dil ang. Hemi atan hian Nodal Officer Pu Vanlalbiakzauva, SDC hnenah dilna hi ngaihven tur a ni ang.

4. In sakna tur/retaining wall siamnaa hman tur bungraw lak khawm leh thiar kual phalna hi DC office Lawngtlaiah dil tur a ni a. Dilnaah chuan a hnuaia tar lan ang hi chiang takin ziah tur a ni:

1) Bungrua : Balu/Cement/Lung/Rod, etc.

2) A zat : 407 trip khat/Bag 30/Quintal 5, etc.

3) Lakna tur hmun : Kawlchaw/Tuipui Ferry/Bazar, etc.

4) Vehicle Number : MZ OX XXXX

5) Driver Hming : Hming

6) Driver Contact Number : Phone Number

7) Dahna tur hmun : Bethel Veng, Lawngtlai, etc.

8) Lak tum ni : 20.04.2020, etc.

Dilna hi Nodal Officer Pu Vanlalbiakzauva, SDC hnenah ngaihven tur a ni ang.

5. In sakna leh hna dang thawhnaa hlawhfa (labour) chhawrte hi Lawngtlai district chhunga awm sa chauh an ni tur a ni a. Mizoram pawn leh Lawngtlai District pawn atanga chah luh phal a ni lo. Tin, hmun khatah mi panga (5) aia tam awm tur a ni lo va, metre 1 aia inhnaiha awm loh tur niin, hmui tuamna (mask) vuah zel tur a ni bawk.

6. Hlawhfa chhawr theih hun chhung hi Thawhtanni atanga Inrinni (Monday to Saturday) zing dar 9 atanga tlai dar 5 (9:00 am to 5:00 pm) a ni ang.