2916/2024-2025

Dated Lawngtlai, 11th November 2024 : Sawrkarlaipui leh Mizoram sawrkar hmalaknaa Raltante tana buhfai sem chhuah tura ruahman chu vawiin khan Kanaan Refugee Camp, Chandmary, Lawngtlai tana hlanna hun neih a ni a. Pu Cheemala Siva Gopal Reddy, IAS, Lawngtlai District bawrhsap chuan buhfai hlanna hi a nei.

Pu Cheemala Siva Gopal Reddy, IAS,  chuan Sawrkarlaipui leh Mizoram sawrkarin Raltlante dinhmun leh harsatna  hriain theihtawp a chhuah thin tih a sawi a. Ei leh bar kawnga an harsatna phuhrûkna pakhat atan Lawngtlai District -a Raltlan awm zawng zawngte hnenah buhfai pek a ni dawn a ti. Bawrhsap chuan Kanaan Refugee Camp, Chandmary- a awm mekte chu thuawih taka awm tur leh sawrkar hriatpuina tello a an awmna hmun sawn mai lo turin a chah a. Naupangte tana zirna ngaipawimawh a, ziak leh chhiar thiam tura zirna kalpui kawngah theihtawp chhuah tura chahin,  Fai leh thianghlim kawngah pawh nasa zawka hmala tur leh an chenna  In leh a chhehvel tha taka vawng fai turin chah.

Bawrhsap chuan Lawngtlai chu International Border - a awm a nih angin Ruihhlo tawlhruk kawngah fimkhur a tul hle a ti a. A bik takin Raltlante chu Ruihhlo zuar leh tawlhruk emaw Dânin a phalloh thila inhnamhnawih lo turin a chah a. Raltlan an nih angin tualchhung mite nena inngeih taka chengho tura tan la turin a fuih a. Pu Cheemala Siva Gopal Reddy chuan Raltanten harsatna an neihah anmahni tanpui tura sawrkar a awm  reng thu a tarlang bawk.

Rev. Kay Thang Pawn chuan Raltlante aiawha thusawina neiin, Lawngtlai mipuiten an lo chhawmdawl kawngah thinlung taka an lawm thu a sawi a. Sawrkar, Kohhran leh Tlawmngai Pâwl ten kawng hrang hrangin an tanpui reng tih tarlangin, kawng engkimah Raltante chuan lawmthu an sawi mawlh mawlh a ni, a ti.

Tun dinhmunah hian Lawngtlai District - ah Raltlan (Myanmar, Bangladesh, Manipur) mi - 8020 awm mekin, a tam ber chu Lawngtlaia awm an ni a. Raltlante tan hian Buhfai - 1520.22 quintals sem chhuah a ni dawn a, cheng 1,500,000 sên ral tur niin, a hma thei ang bera Refugee Camp zawng zawnga hlan tura ruahmanna siam fel tawh a ni bawk.

Vawiin Kanaan Refugee Camp, Chandmary, Lawngtlai tana buhfai hlanna inkhawm hi Pu Zoramsiama Hmar, Addl. DC chuan a kaihruai a. Pu Pu Dinesh Kumar Muhal, IAS (SDC), Pu  Zonunchama Ralte (DIPRO), leh  DC Office Staff bakah Village Council  (VC) Member, Chandmary, Lawngtlai ten an telpui thei a ni.