No.6167/2020-2021

Lawngtlai, Khuangchawi thla ni 16, 2020: Lawngtlai Vengpui-II Village Council area leh Electric Veng Village Council area-ah te mipui zingah Covid-19 kai an awm tih hriat a nih avangin vawiin khan Lawngtlai Bawrhsap Dr Andrew H. Vanlaldika chuan contact tracing chak zawka kalpui a nih theih nan The Mizoram Epidemic Diseases (COVID-19) Regulations, 2020 regulation 11(1)(b) behchhanin Lawngtlai khawpui chhunga veng pathum - Vengpui Village Council area, Vengpui-II ViIlage Council area leh Electric Veng Village Council area te chu "Containment Area"-ah a puang.

Containment Area chhungah hian Deputy Commissioner, Lawngtlai Ieh a veng neitu VLTF-in phalna an pek te, Medical leh Security Duty leh chanchinbu mite tih loh chu tu mah luh leh chhuah phal a ni lo va. Tul tawp a nih loh chuan containment area puanna veng mipuite pawh pawn chhuah leh inlen pawh loh tur tih niin, veng leh veng inkal pawhna kawng (main road) erawh tlan tlang phal a ni thung a. He thupek hi thu leh awm hma chu hman a ni ang.

Vawiina District Hospital Lawngtlaia Rapid Antigen Test atanga COVID-19 positive pahnih hmuh chhuah a nih vanga thupek hi chhuah a ni a. Positive hmuh chhuahte hi Lawngtlai Covid Care Centre (CCC)-ah dah luh nghal niin, contact tracing team-in a tul ang angin hma an la nghal a. Lawngtlai Bawrhsap Dr Andrew H. Vanlaldika chuan sawrkarin tih tur tul ang ang a bawhzui nghal avangin mipui tan chiaina tur a awm lo tih a sawi a. Mipuite chu fimkhurna dan hrang hrang - kut sil fai that, hmai tuamna hman that leh mi dang nen inhnimhnaih loh tih leh sawrkar thupek leh kaihhruaina hrang hrangte uluk zawka zawm zel turin a chah thar leh a ni.