516/2022-2023
Ṭomir thla ni 18, 2022: Tunlaiin Mizoram hmun hrang hrangah African Swine Flu/Fever (ASF) hri a leng mek a. Lawngtlai District chhunga ran vulhte ASF hri leng laka an him theih nan Lawngtlai District Magistrate & Bawrhsap Dr Andrew H. Vanlaldika, MCS chuan CrPC section 144-na tlawh chhanin May ni 13, 2022 khan a hnuaia mi ang hian thupek a chhuah.
"1. Lawngtlai District chhungah ram dang aṭang leh district dang aṭangin vawk leh vawksa aṭanga siam reng reng lak luh phal a ni lo.
"2. Mi tu mahin ui khawlaiah an chhuah tur a ni lo. An chhuah a nih pawhin a neitute'n chain-a thlungin, an kai tur a ni.
"3. Ar (Zo ar) vulhtute'n an ar vulh khawlaiah chhuah phal a ni lo; a in/bawmah an khung vek tur a ni.
"4. Mi tu mahin an ran vulh lai khawlai leh ramhnuaia tla chi - sial, kel leh a dangte a mei vuan lovin (enkawltu awm lovin) khawlai leh ramhnuaiah an tlattir tur a ni lo. Khawlaia an chhuah a, mi kut an tuar a nih pawhin eng mah an sawi buai thei lo ang.
"5. Vawk vulhtute'n an ran vulh a huangah an khung vek tur a ni.
"6. Ran talhtute'n an ran talh tur a hrisel ṭhat leh ṭhat loh an entir hmasa ngei ngei tur a ni. Vety Doctor te'n certificate an pekte chauhin ran an talhin an zuar thei ang."
He thupek hian thu leh a awm a nih loh chuan puan a nih aṭanga thla 2 chhung a huam ang a. A zawm lote chu IPC section 188-na hmanga hrem an ni ang.
