N0.3452/2019-2020

Lawngtlai District Magistrate leh District Disaster Management Authority Chairman Pi Shashanka Ala, IAS chuan vawiin khan inkharkhip chhunga Myanmar atanga Mizorama lo luh a rem loh thu Myanmar lama Zo hnahthlakte’n an lo hriata an zawm theih nan a hnuaia mi ang hian hriattirna leh ngenna a chhuah.

“Novel Coronavirus (COVID-19) hri leng mek laka kan him theih nan India ram pumah inkharkhip (lockdown) kalpui mek a ni a. Hemi chhung hian ram chhunga inkal pawhna leh chet velna hrang hrang tihtawp a nih bakah, ram dang nena inkal pawhna ramri (international border) kana luh leh chhuah khap tlat a ni a. Myanmar atanga Mizorama lo luh hi khap tlat a nih bakah, lut duh an awm paw’n phalna an hmuh theih nan lo puih pawh a rem lo a ni.

“Hei vang hian Myanmar-a kan Zo hnahthlak awmte emaw, khualzin cham bangte emaw pawh he inkharkhipna hi hlih a nih hma chu mahni awmna hmuna lo awm rih tur leh Mizorama lo luh emaw, lo let emaw tum rih lo turin kan inngenin, kan inhriattir a ni.

“He thu hi a theih anga min puanzarsak a, hemi kawnga hma min lakpui tur hian Myanmar-a Zo hnahthlak pawl hrang hrangte kan ngen bawk a ni.”