Lawngtlai, Pawltlak thla ni 6, 2020: Lawngtlai District chhungah COVID-19 positive case hmuh chhuah belh zel a nih avang leh mipui him tlan nan leh contact tracing leh testing te chak zawk leh felfai zawka kalpui a nih theih nan te vawiin khan Lawngtlai Bawrhsap, District Level Task Force Chairman ni bawk Dr Andrew H. Vanlaldika chuan Disaster Management Act, 2005 tlawh chhanin Lawngtlai khawpui (town) huam chhungah ni 07.12.2020 (Thawhtanni) chhunlai dar 12:00 atanga ni 08.12.2020 (Thawhlehni) zan dar 11:59 thleng partial lockdown a puang a. Partial lockdown puan chhunga zawm tur inkaihhruaina a hnuaia mi ang hian a chhuah bawk.

1.    Lawngtlai Town area chhunga pawn lam atanga khualzin cham mek, mahni khaw lama haw duh turte chuan ni 07.12.2020 (Thawhtanni) dar 12:00 noon hmain Lawngtlai khawpui chhuahsan theih a ni ang. Hemi chhunga chhuak lote chu Partial Lockdown puan chhungin an veivah phalsak an ni tawh lo vang.

2.    Pawn lam atanga Partial Lockdown puanna area-a luh leh chhuah (zin veivah) khap a ni. Hei hian Home Department-in Mizoram luh phalna a pek te, Mizoram pawna chhuak tur te, damlohna (medical emergency) leh chhiat tawh thila chhungkhat hnai zual (pi leh pu, nu leh pa, tu leh fa leh pianpui unau) te veivahna a huam lo vang. Heng ngaihhnathiam turte hian Sawrkar-in permission a pek emaw, VLTF lehkha emaw an nei ngei tur a ni ang.

3.    Lawngtlai kal tlang turte chu kal tlang phalsak an ni a; nimahsela, khaw chhungah an ding muang tur a ni lo.

4.    Partial Lockdown puan chhung hian VLTF duty-te’n mahni duty area bak chhuahsan loh hram tur a ni.

5.    Heng Partial Lockdown puanna pawn lam atangin ni tin mamawh (essential commodities) leh bungraw dang (non-essential commodities) lak luh phal a ni. Heng bungrua chaw lut leh thiar tur reng reng chuan an veng chhung VLTF phalna an la hmasa ngei ngei tur a ni ang.

6.    Heng Partial Lockdown puanna area-ah hian ni tin mamawh (essential commodities) zawrhna dawrte chu, chhuanchham an awmin veng chhung VLTF ruahmannain hawn theih a ni chauh ang. Dawrkaite hian dawr kawngkaah anmahni dawrtute hman tur hand sanitizer dahin, social distancing an zawm tha tur a ni a. Tin, anmahni dawrtute hming, veng, phone number leh an rawn dawr hun ziah luhna register-ah an chhinchhiah vek tur a ni. Sulhnu App (bar code tarin) siamin, hemi atan hian an hmang thei bawk ang.

7.    Damdawi dawrte chu veng chhung VLTF-te hriatpuinain hawn theih a ni ang.

8.    Zirna in, training institute leh sakhaw biakna hmunte chu khar chhunzawm zel a ni ang.

9.    Mitthi vuinaah mi 35 aia tam pun khawm khap a ni. Mitthi vui chungchangah chhiatni/thatni chungchanga State sawrkar order ni 13.08.2020-a chhuah chu khauh taka kenkawh tur a ni ang.

10.    Phalna neia pawn (damdawi dawr/office/damdawi in/vantlang hmun)-a chhuak tur reng reng chuan face mask emaw hmanraw dang emaw hmangin hmai an tuam ngei ngei tur a ni.

11.    MDC General Election 2020 ni 04.12.2020-a neih chu ni 08.12.2020-ah result puan a nih dawn avangin election kaihhnawiha mawhphurhna nei candidate leh election agent-te tan heti ang hian an veivahnaa harsatna an neih loh nan ruahmanna siam a ni:

a)    Political Party-te’n election kaihhnawiha party thil buaipui tur mi sawmhnih (20) an inruat (DC Office atanga lehkha pek chhuah tawh) te chu veivah phalsak an ni a, chung mite chuan tul bik thilah party office an hawng thei ang. Political Party tin te’n anmahni party chhungah Sawrkarin inkaihhruaina a siam SOP tha taka zawm vek tur a ni ang.

b) Candidate leh election agent-te chu election thila an tih tur an tih theih nan an veivah phalsak an ni ang a. An nihna tichiang turin anmahni party office atangin lehkha an nei vek tur a ni a, an motor hmanah pawh an nihna tichiang turin lehkha an tar vek tur a ni. Tin, Independent Candidate-te'n an nihna tichiang turin ID Card an insiam thei ang a, an motor hman turah "Independent Candidate" tih leh an dinna bial hming ziahna an tar tur a ni ang.

12.    Heng Partial Lockdown puanna huam chhunga chengte chuan phalna nei lovin tu mahin mahni in leh compound an chhuahsan tur a ni lo va, tu mah an inlen pawh phal a ni lo bawk. Hei hian a hnuaia mite leh an veivahna lirthei a huam lo vang:

a) Sawrkar hnathawk - office kal tura tihte kal leh haw lam. Sawrkar office-te chu staff hmun thuma thena hmun khat (1/3) detail-in an kal thei ang a, Head of Office te’n office inkal chhawk dan turah ruahmanna an siam ang a, chumi order chu staff office kal turte tan permission a ni nghal ang. 

b)    Covid-19 duty atana ruat bik leh VLTF member leh volunteer-te.

c)    Medical leh veterinary emergency duty leh hospital-a thawkte.

d)    Bank, ATM, postal, telecom service provider leh Food Corporation of India-a hnathawkte.

e)    Press, print & electronic media, cable leh internet service-a thawkte.

f)    Bawnghnute sem leh bawlhhlawh paih hna thawktute.

g)    Petrol pump leh LPG delivery-a thawkte.

h)    Police duty, P&E duty, PHE duty, PWD duty, Fire & Emergency duty leh Jail duty-te.

i)    Election official-te leh election kaihhnawiha duty leh mawhphurhna nei zawng zawngte. Heng election thila hman lirthei reng rengah chuan “Election Duty” tih tar vek tur a ni ang.

Heng phalna pek zawng zawngte hian anmahni nihna tichiang thei tur photo identity card emaw appointment letter emaw an keng ngei tur a ni.

He thupek zawm lo chu Disaster Management Act, 2005 Section 51 atanga Section 60, the Mizoram (Containment and Prevention of the Spread of COVID-19) Act, 2020 Section 5 leh IPC Section 188 hmangin hrem theih an ni.