Lawngtlai Bethel veng Village Health Sanitation & Nutrition Committee (VHSNC)-in an veng chhunga sub-centre clinic dah tura an hma lakna chhuanawm tak avangin Health Department, Lawngtlai chuan VHSNC clinic kalpui turin ruahmanna a siam a. Chumi hawnna leh a thlawna inentirna chu vawiin khan Lawngtlai Bethel veng VHSNC clinic-ah buatsaih a ni. 

He hun hi Lawngtlai Chief Medical Officer Dr Thani Pachuau chuan hmanpuiin, clinic hi a hawng nghal a. Lawngtlai Bethel veng VHSNC hma lakna leh veng chhung mipuite inlungrualna leh thawh hona chu fakawm a tih thu sawiin, chak taka hma la chho zel turin a chah a. Veng mipuite beisei anga sub-centre clinic pangngai hawn mai theih a la nih rih loh avangin, thawktute inhuamna avang liau liauva VHSNC clinic chu kalpui theih tur a nih thu a sawi a. Thil tha dawn duh chuan dawng tlaka mahni lam inbuatsaih ve a tul thu sawiin, Bethel veng mipuite leh VHSNC chu thil tha dawng tlak, veng dang tan pawha entawn tlak tak nia a hriat thu a sawi. 

VHSNC clinic hawnna hun hi Bethel veng VCP Pu T.Lalramchunga’n a kaihruai a. Branch YLA Adviser Pu PT Vanrosiama’n hunserh hmangin, Sr Medical Officer Dr S.Thaizi, World Vision India (CADP)-a Bethel veng bialtu Pu T.Touthang leh Branch YLA Adviser Pu C.Hrangbuta te pawhin thu an sawi a. Bethel veng ASHA Pi Vanlalremi’n report pein, YLA Asst Secretary Pu H.Lalrobuanga’n lawm thu a sawi bawk. 

Lawngtlai Bethel veng sub-centre clinic building hi kum 2013 khan BRGF sum hmanga sak a ni a. Sub-centre clinic pangngai anga kalpui theih a la nih loh avangin hman lovin rei tak a awm a. Tun hnaiah VHSNC chuan VC te leh khawtlang mipuite nen tang rualin building chei that leh tihfai hnatlang te an thawk a. Clinic-a dah tur almairah, chair, dawhkan, purdah leh thil tul dang hrang hrang pawh thawh khawmin dah nghal a ni a. World Vision India (CADP)-in nau bukna leh BP check-na hmanrua an pe bawk a ni. 

Bethel veng hi College veng Sub-Centre bial chhunga awm a ni a. He VHSNC clinic-ah hian College veng Sub-Centre atang hian kar khatah health worker pakhat hi ni khat thu thin tura ruahman a ni. Hawnna hun hman zawh hian National Programme for Prevention and Control of Cancer, Diabetes, Cardiovascular Diseases & Stroke (NPCDCS) te chuan veng mipuite tan a thlawna inentirna an buatsaihsak nghal a ni.