939/2024-2025

2024 Nikir thla ni 25: June ni 27, 2024 (Ningani)-a Lai Autonomous District Council (LADC) hnuaia 12-Lawngtlai Chandmary biala Member of District Council (MDC) by-election buatsaih tura inthlan buaipui tura ruat Presiding Officer (PRO) leh Polling Officer (PO) te tan vawiin khan Lawngtlai DC Conference Hall-ah training thawh hnihna buatsaih a ni.

Lawngtlai BDO Pu Collin Hlychho chuan training hi pein, inthlan buatsaih dan tur leh hriat tur pawimawh hrang hrang a zirtir a. Lehkha pawimawh (form) hrang hrang hman dan leh EVM hman dan te a taka zir ho ni bawkin, zawhna leh chhanna leh sawi hona hun hman a ni bawk.

He hunah hian LADC hnuaia VC Inthlanpui leh MDC by-election-a polling official duty tur, postal ballot-a vote thlak dilte tana vote thlak theihna, facilitation centre ruahman ni bawkin, polling official-te chuan postal ballot vote an thlak nghal bawk a ni.

Lawngtlai Chandmary MDC bialah hian polling station pali - Lawngtlai Chandmary North-I, Lawngtlai Chandmary North-II, Lawngtlai Chandmary South-I leh Lawngtlai Chandmary South-II - a awm a. Polling station tinah hian inthlan buaipui turin PRO 1 leh PO 2 ṭheuh an awm dawn a. Electronic Voting Machine (EVM) hmangin vote thlak tur a ni.

Lawngtlai Chandmary bial MDC by-election buatsaih turah hian vote nei mi 2,798 (mipa 1,313 leh hmeichhia 1,485) awmin, inthlan chuhtu candidate mi pathum - Pu F. Hrangtukhuma, ZPM; Pu K. Lalawmpuia, BJP leh Pu C. Lalsawmzuala, MNF te - an awm a. Ruahman lawk dan chuan June ni 27, 2024 (Ningani) zing dar 7:00 leh tlai dar 5:00 inkarah vote thlak a ni ang a. Vote tlate hi July ni 1, 2024 (Thawhṭanni) chawhma dar 10:00-ah chhiar ṭan a ni ang.