Lawngtlai DC Dr A. Muthamma IAS chuan vawiin khan Lawngtlai khawpui chhunga anganwadi centre tlawh kualin, an dinhmun a en fiah.

Lawngtlai DC hian anganwadi centre pathum - Bazar Veng-II, Lawngtlai-I 'A' leh Lawngtlai-I 'C' Centre te a tlawh a. An centre kalpui dan, an nutrition dawn dan leh naupang an zirtir dan te a en fiah a. Thawktute chu tha taka  entre hawng thin tur te, an huam chhunga anganwadi-a kai rual naupang zawng chhuaka zirtir thin tur te, naupang hming tha taka ziaka vawng tur te, an thil dawnte tha taka sem chhuak thin tur te leh centre-ah ngei chaw leh ei tur dang siama sem thin tur te'n a chah a. Naupangte chuan an tet lai atanga chaw tha an dawn a, zirna boruak leh enkawlna tha tak hnuaia an sei len a pawimawh a ni tiin, chumi atan chuan angawadi-a thawkte'n mawhphurhna sang tak an nei a ni, a ti.

Vawiina anganwadi centre a tlawhnaah hian Lawngtlai DC hi Lawngtlai CDPO Pi Hlawnchii leh DIPRO Pu C.Lalhruaitluanga te'n an tawiawm a ni.