2244/2025-2026

Lawngtlai, 17th November, 2025 : Lai Autonomous District Council (LADC) hnuaia 12th Member of District Council (MDC) inthlanpui 2025 - lo awm tur atan a inbuatsaihna kal zelah vawiin khan District Election Officer (DEO) Pu Donny Lalruatsanga kaihruiaiin Sector Officer, Static Surveillance Team (SST) leh Flying Squad Team (FST) ten DC Conference Hall-ah thutkhawm an nei.

Pu Donny Lalruatsanga chuan kalkhawmte hnena lawmthu sawina a nei hmasa a. Sector Officer-ten an bual chhungah Model Code of Conduct (MCC) bawhchiatna awm lo tur leh a tul anga SST leh FST - te hmang tangkai turin a chah a. SST leh FST - a team leader theuhte chu an naute kaihruai kawngah theihtawp chhuah tur leh, tha taka mawhphurhna hlen chhuak turin a fuih a. State Election Commission (SEC) hnuaiah an awm vek tawh tih hrechiang a, inthlanna hlawhtling tak nei tura theihtawp chhuahpui turin a sawm a ni.

DEO chuan inthlanna felfai leh tluang tak awm turin ruihtheihthil laka fihlim a pawimawh hle tiin, fihlim theuh turin a chah a. Thawhhona leh tanrualna tha awm turin midangte thawhpui thiam a tul a, kawng engkimah thawkho tlang turin a ngen a. A bik takin NGO leh mipuite theihtawp lo chhuahpui turin a sawm nghal bawk.

Pu Collin Hlychho Election Officer (EO) chuan Sector Officer - ten an bial theuh an tlawh hunah Sector Officer Visit Report - ngaipawimawh tur leh a hun taka Election Branch - lam a thehlut turin a chah a. SST leh SST Leader- te pawh Report Format - uluk taka vawng tur leh a hun taka Election Branch - thehlut turin a chah nghal bawk a ni.

Thutkhawmah hian Sector Officer, SST leh FST - Team Leader - ten harsatna leh zawhna chi hrang hrang an neihte sawihona hun hman a ni a. Sector Officer-ten tun kar zirtawp (21st, November,2025) ah report hmasa ber thehluh hman ni se an ti a ni.

Vawiin thutkhawmah hian Sector Officer, SST leh FST - Team Leader te an tel kim vek thei a, Pu Donny Lalruatsanga chuan lawmthu sawina neiin hun a khar.