2138/2025-2026

Lawngtlai, 10th November 2025: Lai Autonomous District Council (LADC) hnuaia 12th Member of District Council (MDC) inthlanpui 2025 - lo awm tur atan a inbuatsaihna kal zelah vawiin khan Pu Donny Lalruatsanga, District Election Officer ( DEO) chuan Medical Board - te a Office Chamber-ah thutkhawm a neihpui.

Pu Donny Lalruatsanga chuan Medical Board - te chunga lawmthu sawina a nei a. LADC inthlanpui lo awm turah vote thlak tur ni puan a nih tawh angin Election duty- turte pawh ruat fel an nih tawh thu a tarlang a. Election duty - turte zingah chhuanlam siam thin an awm chu pawi a tih thu tarlangin, Medical Board- paltlangte chauh ngaihthiam an nih tur thu a sawi a. DEO chuan hrisel lo, natna khirh tak nei erawh awm theih a nih angin, Medical Board - te chu uluk taka lo endik thin turin a chah a ni.

Dr. Lalmuanawma Jongte, Sr. CMO leh Chairman, Medical Board- nibawk chuan terms of reference- fel fai tak an siam tawh thu tarlangin, hemi paltlang te chauh medical certificate - siamsak an nih tur thu a sawi a. Uluk taka endikna kalpui a, dam lohna tak tak neite chauh phalna pek an nih tur thu a tarlang a ni.

Election duty - turte zingah hrisel lohna vanga exemption- dil turten Pu Gilbert Lalhlimpuia, Nodal Officer, ( Man Power Management) hnenah dilna theh luh tur a ni a. A niin tul leh awm a tih chu Medical Board- ah a thehlut ang a, exemption - diltu hian Medical Board- a hmachhawn hnuah, Medical Board- hian thu tlukna an siam leh dawn a ni.

Medical Board - ah hian Dr. Lalmuanawma Jongte, Sr. CMO, chu Chairman niin, Dr. Lalremruata, Medical Superintendent, chu Secretary niin, Member- 8 an vaiin mi- 10 an awm a ni.

Vawiin thutkhawmah hian Medical Board- Member- te an tel kim tha hle a,  Pu H. Zonunmawia Returning Officer (RO) leh Pu Collin Hlychho Election Officer (EO) ten an telpui thei a. Pu Donny Lalruatsanga chuan lawmthu sawina neiin hun a khar.