1952/2024-2025

Lawngtlai, the 7th September 2024 : Hriselna pawimawhna leh HIV (AIDS) laka fihlim tura inzirtirna pawimawh tak pakhat nibawk  'Run for Health (Marathon)' chu Mizoram State AIDS Control Society (MSACS) leh Red Ribbon Club, Government Lawngtlai College, tangkawp  buatsaihin  tukin zing dar 6:30 khan Areopagy, Lawngtlai Bazarah vailiamna hun neih a ni a. He hun hi Lawngtlai District Bawrhsap Pu Cheemala Siva Gopal Reddy, IAS, chuan hmanpuiin Marathon tlan tur te hi  a vailiam.

Pu Cheemala Siva Gopal Reddy, IAS chuan Marathon tlan tura lokal zawng zawngte hnena lawmthu sawina neiin,  hriselna piah lama HIV/AIDS Awareness Campaign - pawimawhna hria a, Marathon buatsaihtu Principal, Government Lawngtlai College leh a thawhpuite bakah  MSACS-  te fakawm a tih thu a tarlang a. Hriselna chu thil hlu tak, a thawh a thawhchhuah ngai a ni tiin Bawrhsap chuan  rilru leh taksa hrisel tha tak nei turin mitinin theih tawp chhuah a ngai a ni, a ti. A bik takin thangtharte zing ah hriselna atana  taksa sawizawi thin  an tlem hle ni a ahriat thu sawiin, hei hi thil thalo tak a ni a, hriselna tello chuan eng hna mah a thawh tak tak theih loh tiin, hriselna tha nei tura  uar zawka taksa sawizawi kawnga tan la thar turin a sawm.

Bawrhsap chuan Sawrkarlaipui pawhin hriselna a ngaipawimawh hle a, Campaign leh Movement hrang hrang a kalpui mek  tih tarlangin, Government Lawngtlai College hmalakna pawhin Lawngtlai mipuite rilruah nghawng thuk zawk a neih a beisei tih a sawi a. Tukin Marathon  hlut bikna sawiin Pu Cheemala Siva Gopal Reddy chuan  hriselna atan chauh ni lo a, HIV/ AIDS laka filhim tura in zirtirna a ni kawp hi a ni, a ti a. Lawngtlai mipuiten hriselna tha zawk an neihna tura taksa sawizawi lo ngaipawimawh zel tur leh HIV/ AIDSA do na kawnga theihtawp chhuahpui turin Lawngtlai mipuite a  sawm nghal bawk.

Tukin 'Run For Health (Marathon)' ah hian Government Lawngtlai College zirlai engemaw zat tel theiin, Areopagy, Lawngtlai Bazar atanga Seventy-One, Lawngtlai College Veng inkar  kawngpuiah an tlan a ni.