Lawngtlai, Sahmulphah thla ni 6, 2020: Mizoram puma 26.10.2020 atanga 9.11.2020 inkar chhunga COVID-19 laka inven nana inkaihhruaina dan hrang hrang khauh zawka lekkawh tura 'COVID-19 No Tolerance Fortnight' ruahman chu Lawngtlai District chhungah pawh khauh taka kal chhohpui zel a ni a. Vawiinah tlai dar 5:00 thleng khan dan bawhchhia mi 62 man niin, pawisa Rs 8,900/- chawitir an ni a. Fortnight chhung hian dan bawhchhia mi 762 man tawh niin, pawisa chawitir zat hi Rs 88,300/- a tling tawh a ni.
Vawiina dan bawhchhia mante hi vantlang hmuna hmai tuamna (mask) vuah tha lo mi 59 leh COVID-19 laka himna tura sawrkar ruahmanna leh inkaihhruaina dang zawm lo mi 3 an ni a. The Mizoram (Containment and Prevention of the Spread of COVID-19) Act, 2020 section 5(1) leh section 5(9) hnuaiah te hrem an ni.
