No.1720/2020-2021
Lawngtlai, Nikir thla ni 7, 2020: Nizana Zoram Medical College (ZMC)-a swab sample 250 endik zingah Lawngtlai District mi leh sa, Lawngtlaia quarantine centre-a khung hran lai pahnih te chu COVID-19 positive an ni tih hmuh chhuah a ni a. Hemi avanga chi-ai phah lo turin Lawngtlai Bawrhsap Pi Shashanka Ala, IAS chuan District mipuite a chah.
Lawngtlaia COVID-19 positive hmuh chhuahte hi Delhi atanga lo haw, June ni 1, 2020-a Lawngtlai lo thleng a, Lawngtlaia inkhung hranna hmuna khung nghal leh tuna la awm mek niin, anmahniah he natna lan chhuahna eng mah hmuh tur a awm lo va. Hriat chhuah an nih veleh lak hran nghal niin, District Hospital Complex-a Covid Care Centre-ah mi dang pawh theih loh tura dah luh nghal an ni.
Contact tracing pawh tih nghal a ni a. Ruahmanna fel tak hnuaia lo haw, an lo thlen veleha khung hran nghal an nih avangin mipui tan hlauhthawn tur a awm lo va. An lo hawpuite leh an awmpuite swab sample hi medical team te'n la fel tawhin, ZMC-ah test tura thawn phei a ni tawh a, result la nghah mek a ni.
Lawngtlai Bawrhsap chuan mipuite chu chi-ai lo tur leh tul zual bik thil a nih loh chuan pawn chhuak lo turin a ngen a. Damlote nihna tilang thei leh mi dang tichi-ai thei thuthang dik lo social media-a vawrh darh lo turin a ngen bawk.
Attachment
- Loading attachment...
