No.2758/2020-2021

Lawngtlai, Vawkhniahzawn thla ni 5, 2020: Nizana Zoram Medical College (ZMC)-a RT-PCR test-ah Lawngtlai District atanga swab sample test 50 zinga 4 chu positive a ni tih hmuh chhuah a ni a, 46 erawh a negative thung.

Positive case hmuh chhuah tharte hi kum 18-28 inkar, mipa vek niin, Guwahati atanga lo haw, Government Quarantine Facility-a khung hran lai an ni a. Anmahniah natna lan chhuahna a awm lo va, Lawngtlaia Covid Care Centre-ah dah hran nghal an ni.

Lawngtlai Bawrhsap Dr Andrew H. Vanlaldika chuan Lawngtlaia positive pali hmuh chhuah tharte chu tha taka khung hran sa an nih avangin mipui tan chi-ai phahna tur a awm lo tih a sawi a. Covid vanga damlote enkawl chungchangah leh hri dona kawngah sawrkarin a tih tur ang ang hlen chhuak turin theih tawp chhuah a nih tur thu a sawi. He hri laka him zel tur leh mipui vantlang zinga a darh loh nan kut sil fai, hmai tuam that, mi dang nena inhnaih chilh loh leh mimal hriselna vawn that kawngah mipuite chu fimkhur chhunzawm zel turin a chah nghal a ni.

Tun dinhmunah Lawngtlai District chhungah government quarantine facility 7 a awm mek a. Covid kaite leh a kai thei awma rinhlelhte khung hranna Covid Care Centre leh Covid vei, natna lang chhuak enkawl ngai zual dahna tur Dedicated Covid Health Centre a awm bawk a. Khung hran mek - government quarantine facility-ah mi 171, Covid Care Centre-ah mi 5 leh home quarantine-ah mi 25, an zavaiin mi 201 an awm.

Lawngtlai District atang hian Zoram Medical College (ZMC)-ah RT-PCR test turin swab sample 898 thawn a ni tawh a. Result hi hriat kim tawh niin, positive case 4 a awm mek a ni.




Attachment

  • Loading attachment...