No.1403/2020-2021

Lawngtlai, Tomir thla ni 26, 2020: Vawiin khan Lawngtlai DC Conference Hall-ah Lawngtlai Bawrhsap Pi Shashanka Ala, IAS hovin Comprehensive Telecom Development Plan for North-Eastern Region (CTDP-NER) hnuaia Lawngtlai District chhunga inbiak pawhna tichangtlung tura hma lak mek dan, a hna thawktu Bharti Infratel Ltd mi leh sate nen sawi ho a ni.

Bawrhsap chuan inbiak pawhna tha lo chuan hna thawh a tiharsa thin hle tih sawiin, CTDP hnuaia district chhung inbiak pawhna tihchangtlun a ni chho mek chu lawmawm a tih thu a sawi a. Tun hnai maia district chhim lam a fannaah danglamna nasa tak a hmuh thu sawiin, tun hmaa mobile network awm lohna hmun tam taka mobile network awm thar chuan hma sawnna hna dang thawhna kawngah pawh nasa taka a puih tur thu a sawi a. A hna thawktute chu lawm thu a hrilh rualin, chhum lo chat lova network tha a awm reng theih nan theih tawp chhuah turin a chah nghal a. SIM card pek chhuah chungchangah pawh Lawngtlai District chu ramri hnaiha awm a nih avangin ID card rin tlak tak neite hnenah chauh pe chhuak turin a chah.

Bharti Infratel Ltd (Airtel) lam atanga lo kalte chuan an hna thawh dan leh tuna an dinhmun tlangpui bakah, harsatna an tawh te an tar lang a. He’ng harsatnate hi a chin fel dan tur sawi ho a nih bakah, CTDP hnuaia hma lakna chu zawh fel thuai a nih theih nan leh a nih dan tur taka kalpui chhunzawm a nih theih nana hma lakna tur hma chhawp hrang hrangte sawi ho a ni bawk.

CTDP hi sawrkar laipui Department of Telecom hnuaia Universal Service Obligation Fund (USOF) atanga thawh a ni a. Hemi hnuaiah hian Bharti Infratel Ltd chuan kum 2018 August thla atang khan Lawngtlai District chhung khaw hrang hrangah Airtel mobile tower thar din turin hma an la tan a. A tirah hmun (khua leh kawngpui) 114 tuam tura ruahman a nih laiin, chhan eng eng emaw vangin hmun 95-ah a tla thla a. Hemi atan hian tower 84 din tura ruahman niin, chu’ng zinga 74 chu tunah hian a nih tur angin hman (function) a ni tawh a. Tower din fel tawh, a khawl pawimawh la dah kim loh pasarih (7) awmin, lockdown vanga hna thawktute an lo kal theih loh avanga hna chawl rih a ni a, hna thawh chhunzawm theih a nih hun hunah peih fel mai theih a nih thu tar lan a ni a. Hmun 3-ah erawh tower hi la din loh hrim hrim niin, a hmanrua leh hna thawktute lak luh theih a la ni rih lo va. Hna chhunzawm theih a nih chuan ni 45 chhung vela zawh theih a nih thu tar lan a ni bawk.

Attachment

  • Loading attachment...