Vawiin khan Lawngtlai Chief Medical Officer (CMO) Dr Lalthlamuana hovin a office chamber-ah Lawngtlaia thu thar theh darhtute hnena Measles-Rubella campaign neih tur hrilhfiahna hun (sensitization) hman a ni.

He hunah hian District Immunization Officer (DIO) Dr S. Thaizi, Lawngtlai District bika mawhphur tura ruat WHO hnuaia Surveillance Medical Officer (SMO) Dr Amitabha Sarkar, Lawngtlai DIPRO Pu C. Lalhruaitluanga leh media mite an tel a. Sentut hri danna pek beihpui thlak (Measles-Rubella vaccination campaign) pawimawhzia leh chanchinbu leh TV kal tlanga mipuite hnena zirtirna pek a tul thu te ngaihthlak a ni a. Dr S. Thaizi chuan powerpoint presentation hmangin sentut (measles) leh sentut-fang/ni-thum sentut (rubella) natna chungchang leh hri danna pek kawnga hma an lak dan tur a sawi fiah a. Hriat tur tul hrang hrangte sawi ho nghal a ni.

Khawvel puma sentut vanga thihna thleng 1,34,200 zinga 49,200 zet chu India rama thleng a ni a. Hei vang hian WHO leh India sawrkar chuan hri danna pek lama nasa taka beihpui thlak  a tum ta a ni. Tun hmaa sentut (measles) hri danna chauh pek thin chu, MR campaign hnuaiah hian a inkawpin sentut leh sentut-fang (measles-rubella) vaccine pek a ni tawh dawn a. Lawngtlai District-ah chuan April ni 16, 2018 hian a hawnna neiin, thla khat chhung district chhunga khaw hrang hrang fangin beihpui thlak a ni dawn a. Naupang thla 9 atanga kum 15 inkar tawh phawt chu, sentut an vei leh vei loh emaw, hri danna an lak tawh leh la lak loh emaw pawh sawi lova hri danna hi pek vek tum a ni a. Lawngtlai district-ah hian hri danna la thei tur thla 9 leh kum 15 inkar naupang 45,950 awm anga chhut niin, he’ng hi an zavaia pek vek tum a ni a. He beihpui thlak hmang hian kum 2020-ah chuan India ramah sentut um bo va, sentutfang (rubella) hi khuahkhirh theih beisei a ni.

Target group-a naupang tam zawk chu sikul naupang an nih avangin, beihpui thlak tan a nih hunah a tir lam chawlhkar hnih chhung chu zirna inah hri danna hi pek phawt a ni ang a. Hemi hnu hian kar hnih dang chu vantlang tan sub-centre, anganwadi centre leh hmun remchang dangah te pek a ni leh ang a. Chawlhkar nganaah chuan target phak loh dan azirin a nawlpui thual nawn leh a ni ang.

MR vaccine hi India ram hmun danga naupang vabelchhe 13 chuang an pek tawh atangin nghawng tha lo a neih hriat a ni lo va. Sentut leh sentutfang te hi natna inkaichhawn theih, thihna leh piansualna thlen thei a nih avangin hri danna pek hi ngai pawimawh tur leh kan tu leh fate, thla 9 leh kum 15 inkar tawh phawt chu, hri danna lo la tawh pawh ni se laktir leh vek turin Health Department chuan Lawngtlai district mipuite a ngen a ni.