Vawiin chawhma dar 11 khan Lawngtlai DC Pu B. Lalhmingthanga hovin a pisa ah Prime Minister Employement Generation Programme (PMEGP) loan District Task Force Committee an thukhawm a. He committee ah hian Lawngtlai District KVI officer Pu C.L Sangchhawna leh  DIC Officer Pu C. Dokulha te bakah  he scheme hnuaia nodal bank hrang hrang Manager te an tel a Lawngtlai District chhunga PMEGP loan diltute interview an neih nghal bawk.

Lawngtlai District KVI hnuaiah hian Nodal Bank 2 awmin Mizoram Cooperative Apex Bank hnuaiah Loan diltu mi 42 an awm a, Mizoram Rural Bank hnuaiah mi 80 in an dil bawk. District Industries Centre (DIC) hnuaiah PMEGP loan diltu mi 69 awm in SBI Lawngtlai branch ah mi 41 leh SBI Chawngte Branch ah mi 28 an ni. Lawngtlai District tan Margin Money cheng nuai 19 ruahman a ni a, PMEGP hnuaia loan lak hi an loan lak atanga za a sawmthum chu sorkar in a rulh sak thin a ni.

Lawngtlai DC Pu B. Lalhmingthanga chuan Loan latuten tha taka hna an thawh a a hun tak a loan an rulh a pawimawh a loan petu Financial Institution te pawhin a hun taka sum an pek chhuah hi scheme hlawhtlinna atan a pawimawh a ni a ti. Mizoten Bank kalphung kan hriat chian  tul a  tih thu sawiin mipuiten lehkha pawimawh leh kan tihtur te felfai taka hlenin loan pek tlak a kan insiam that a ngai a ni a ti bawk.

PMEGP Nodal agency KVI leh DIC hotute chuan a hun taka loan leh instalment te pek a nih theih nan sanction siam hma a pawimawh tih sawiin ruahmanna siam tlai leh loan rulh that loh avanga  harsatna awm thei te an sawi a, loan rul tha lote lakah dan ang a hma lak a tul thu an sawi bawk. PMEGP action plan ang chuan loan hi bank lamin February 2012 ah sanction ti fel a a dawngtu turten March 2012 a dawn fel vek theih turin ruahmanna siam a  ni.