2693/2023-2024

Lawngtlai dated 6th November 2023: Lawngtlai District chhung a Polling Station 181-a duty tur Polling Official leh Security-te chuan vawiin chawhma khan Govt. Lawngtlai College atangin an duty-na tur panin an chhuak fel a. Heng Polling Station hrang hrang vilpuitu tur Sector Magistarte-te pawh an duty-na tur ah an chhuak fel.

Polling Station-a duty tur kal chhuak te hi inthlan buaipuitu tur Polling Personal mi 724 leh Sector Magistrate mi 26 an ni a. Polling Station-a venhimna hna thawk tur Security Personal 356 bak ah venhimna uluk zual bik ngai Polling Station 3-ah CAPF an duty a. Inkalpawh leh inbiakpawh harsatna Polling Station 40-ah MPRO an duty tel bawk a ni.

Govt. Lawngtlai College-ah hian Electronic Voting Machine bak ah Voting Compartment leh Polling Official-te mamawh hrang hrang pek chhuah niin tul zual a hman tur Emergency Light-te ken tir an ni a. A hmun an chhuahsan hma in Returning Officer leh Nodal Officer-te enpuina hnuai ah EVM endikna leh EVM hnu chhuina, Traccar Apps an hmang ngei a ni tih enpui an ni bawk.

Polling Official-te hi an mahni bialtu Returning Officer-te hnen ah theuh inhriattirin an thil ken tur hrang hrang a kim leh kim loh endik sak vek an nih hnu ah an duty-na tur Polling Station panin an kal chhuak a ni. Lawngtlai district-a MLA inthlan kalpuina tur ah hian Polling Station za zel a 60-ah internet hmang a vil theihna, Webcasting kalpui tum a ni bawk.

Nizan a Juralsury Polling Station-a duty tur lirthei chetsualna avang a boral Pu Z.Lalmuanzuala, 4th IR Bn ruang chu vawiin chawhma khan District Hospital, Lawngtlai thlen pui a ni a. Pu Joseph H.Lalramsanga, Deputy Commissioner chuan lo hmuakin vanduaina tawk chhungkua te a tawrhpui thu leh Sawrkar atanga tih tur awm ang angte chu hmalak a nih tur thu a hrilh a. Lirthei chetsualna a tel ve Polling Official leh Security-te pawh uluk tak a Medical Checkup neih sak turin District Hospital-a hotute pawh a chah nghal bawk a ni.

Lawngtlai district-ah hian Voter 91439 awmin 36-Tuichawng Assembly Constituency-ah voter 36042 an awm a, 37-Lawngtlai West ah voter 29493 awmin 38-Lawngtlai East ah voter 25904 an awm bawk a ni. Voter awm zat atanga 45685 chu mipa an ni a, 45754 chu hmeichhia an ni a. Lawngtlai district-ah hian Service Voter 232 awm anga chhinchhiah a ni bawk. 36-Tuichawng AC ah Polling Station 70 awmin 37-Lawngtlai West AC ah Polling Station 69 awm a. 38-Lawngtlai East AC ah Polling Station 42 a awm bawk a ni.