2736/2023-2024

Lawngtlai dated 7th November 2023: Lawngtlai District-a MLA inthlanpui 2023 chu tukin dar 7 atang khan Polling Station 181-ah kalpui tan niin tlai dar 4 thleng khan mi 66430-in vote an thlak tawh a ni. He thu buatsaih lai hian Polling Station thenkhat ah vote thlak tur an la awm tih thu dawn a ni.

Polling Station 70 awmna 36-Tuichawng AC ah Voter 36041 awmin mi 25029 in vote an thlak tawh a, Polling Station 69 awmna 37-Lawngtlai West AC ah Voter 29495 awmin mi 23386 in vote an thlak tawh a, Polling Station 42 awmna 38-Lawngtlai East AC ah voter 25902 awmin mi 18015 in vote an thlak tawh ang a chhinchhiah a ni. 36-Tuichawng AC-a vote tla hi voter awm zat atang chhut in za zel ah 80.87 % a ni a, 37-Lawngtlai West AC ah 80.80 % niin 38-Lawngtlai East AC ah vote 74.22 % tla tawh ang a chhut a ni.

Lawngtlai District-ah hian Youth Managed Polling Station 3 leh Women Managed Polling Station ‘Dingdi PS’ 5 siam a ni a, vote thlak ngai pawimawh tur a mipui hip thei tur a chei, Model Polling Station siam a ni bawk. Lawngtlai District chhung a MLA inthlan hi boruak ralmuang tak hnuai ah kalpui a ni a, khaw hrang hrang viltu Sector Magistrate leh Presiding Officer-te atangin harsatna leh buaina lian tham report a awm lo a ni.

Pu Joseph H.Lalramsanga, District Election Officer chuan boruak nuam leh muanawm tak hnuai a MLA inthlan kalpui a ni chu Polling Official leh Election Official-te inpekna thuk tak vang a nih thu sawiin vote thlak tur a Polling Station-a lo kal voter-te thuawihna leh dawhtheihna chu fakawm a tih thu a sawi. Vote chhiar thleng a inthlan hna hlawhtling tak a kalpui chhunzawm a nih theih nan Political Party hrang hrang hruaitute, khawtlang leh kohhran hruaitute, tlawmngai pawl leh Office hrang hrang hnuai a sawrkar hnathawkte thawhhona a pawimawh zel tur thu a sawi bawk a ni.