DIRECTORATE OF INFORMATION & PUBLIC RELATIONS, Government of Mizoram, India

No.4769/2020-2021

Lawngtlai, Mimkut thla ni 4, 2020: National Bank for Agriculture and Rural Development (NABARD) hnuaia Tribal Development Fund (TDF) sum atanga Lawngtlai RD Block huam chhung khaw sawmpakhat (11)-a World Vision India (WVI), Chhimtuipui Area Development Programme (CADP)-in mi rethei leh harsa zawkte dawm kan nana 'Integrated Tribal Development Project' (ITDP) an kalpui meka hma lakna hrang hrang bul tanna (entry point activity) hawnna hun chu Nimin (4.9.2020) khan Lawngtlai District-a Rulkual khuaa Lianhmung Hall-ah buatsaih a ni a. Lawngtlai Bawrhsap Dr Andrew H. Vanlaldika, MCS chu Khuallian a ni.

ITDP entry point activity atana KMMTTP kawngpui atanga Rulkual peng bula kut hna thawktute chawlh hahdamna tur leh thlai thar an thutpui theihna tur waiting shed sak chu Bawrhsap hian a hawng hmasa a. Chumi hnuah Rulkual khuaah hun hman chhunzawm a ni.

Bawrhsap chuan Lawngtlai District tana World Vision India hna thawh chu ropui a tih thu sawiin, COVID-19 hri leng dona kawngah pawh an thawhhlawk hle a ni, a ti a. Lawngtlai District-a thingtlang mite khai chhuah nana World Vision programme kal lai a tawp dawnah tuna NABARD nena ITDP an chhunzawm leh thei chu lawmawm a tih thu a sawi.

Bawrhsap chuan kut hna thawh chungchangah tihdan hlui vuan reng lo va, tunlai thiamna nena tang kawpa hma lak a tul tih sawiin, ITDP hnuaia kut hna thawktu thlan chhuahte chu mi thiamte thurawn ngaichang a, an thu awih turin a chah a. Hlawhtling turin tum ruhna leh thawh rimna a pawimawh tih sawiin, teirei peih tur leh sawrkar ruahmannate chhawr tangkai thiam turin a chah a. Hna thawk hman lo leka sawrkar office hrang hranga leng kual dun dun mi aiin, mahni huana hna thawk melh melh thin mi chu an ding chhuak zawk zel a ni, a ti.

Nimin hun hman hi Rulkual Village Council Vice President Pu F. Lallianzuala'n a kaihruai a. WVI-CADP Manager Pu Paul T. Touthang chuan inlawmna thu sawiin, Project Coordinator Pu HL Rinawma'n project report a pe a. NABARD-a Assistant General Manager Pu Evan T. Munsong leh KVK Lawngtlaia Senior Scientist & Head Dr Lalfakawma leh kut hna thawktu ai awh te hnen atangin thu sawi ngaihthlak a ni bawk.

Integrated Tribal Development Project hi tribal community thlan bik khaw sawm (11) - Chawnhu, Mampui, Chawntlangpui, Sihtlangpui, Kawlchaw West, Kawlchaw East (Siaha District), Saikah, Saikah Lower, Paithar, R.Vanhne leh Rulkual-ah te kut hna thawka ei zawng chhungkaw thlan bik 200 hma lakpuina tur niin, thei huan siam leh ran vulh hmanga ei zawnna ngelnghet an neih theih nan hma lak a ni dawn a. He project hi kum 6 chhung kalpui tur niin, NABARD-in sum Rs 1,29,83,000/- tumin, World Vision lamin Rs 9,30,000/- an tum ang a, huan neitute'n ram leh tha an thawh ve thung dawn a ni.

ITDP Phase-I (kum 1-na) kalpuinaa chhungkaw 100 thlan chhuahte tana tun thlenga hma lak tawhnate chu:

1. Office lama thawktu 3 leh khaw 2 zel vil tur community organiser 5 lak an ni.

2. Theihai tiak 4700 (chhungkaw 47 tan), serthlum tiak 5300 (chhungkaw 53 tan), thingfanghma tiak 5000 (chhungkaw 100 tan), thlai khura phul tur chinai thi (chhungkaw 100 hnenah), thlai tiak kahna leh fur thlai chi hrang hrang sem a ni tawh.

3. Hma lakna tur khaw 11-ah Farmer Club din vek niin, Sihtlangpuiah thlai chinna tur lei buatsaih dan demonstration training buatsaih a ni a, kut hna thawktu 100 hnenah chhinchhiahna bu vawn dan training pek a ni.

4. Mobile Medical Unit nen tang kawpin hmun hnihah health camp buatsaih a ni tawh.

5. Custom Hiring Centre atan hlo thlawhna khawl 10 leh thlai tui pekna 10 leh mi harsa zawkte tanpui nan pressure cooker 100 sem chhuah a ni a. KVK atangin farmer training material eng emaw zat sem a ni bawk.

6. Paithar leh Rulkualah waiting shed sak zawh tawh a ni.

7. Ruahtui khawlna khur 10 leh lui tui khawlna tuikhur 10 siam mek a ni.

Attachment