No.121/2020-2021

COVID-19 vanga India ram pum inkharkhip kalpui mek laia mi rethei zawkte’n harsatna an tawh lohna tura sawrkar laipui ruahmanna hnuaiah India ram puma Pradhan Mantri Ujjwala Yojana (PMUY) beneficiary chhungkaw vaibelchhe 8 chuan April atanga June 2020 chhungin ei rawng bawlna gas (LPG) bur (14.2 kg cylinder) thum a thlawnin an dawng thei dawn a. Heti ang dawng thei tur PMUY beneficiary hi Lawngtlai District chhungah chhungkaw 3221 an awm.

COVID-19 vanga nunphung a khaihlak lai hian Indian Oil Corporation Limited (IOCL) chuan lirthei tui leh ei rawng bawlna gas-a harsatna a awm loh nan theih tawp chhuahin hma an la a. An hnuaia thawktute leh customer-te tana hamthatna tur hrang hrang an duang a ni.

IOCL hnuaia Lawngtlai leh Siaha District tana District Nodal Officer Pu Akhil Paul chuan IndianOil hnuaia Oil Terminal leh LPG bottling plant-te chawl lova an inchhek khawl char char thu sawiin, nghei hlauhthawn chhan tur a awm lo, a ti a. PMUY beneficiary-te tana thla thum chhunga ei rawng bawlna gas bur thum a thlawna sem tura ruahman chu Lawngtlai District chhung khawpui leh thingtlanga beneficiary zawng zawngin an chan vek theih nan leh a lakna kawngah harsatna an tawh loh nan veng chhunga task force-te’n lo hriatpuiin ruahmanna siampui se a duh thu a sawi a. A thlawna gas lak theih dan tur sawi fiahin, April chawlhkar khatnaah gas retail sale price ang hu sum (avance) beneficiary-te bank account-ah thun a ni ang a, hei hi beneficiary-te’n la chhuakin, gas lak nan an hmang ang a, gas lak nan an hmang ngei a nih chuan May thla leh June thlaah pawisa advance hi thunsak an ni leh zel dawn a ni, a ti.

IndianOil hian an hnuaia hna thawktu, inkharkhip hun chhunga hna thawh tul site chu kum khat atan cheng nuai khat (Rs 1 lakh) medical insurance a tihsak vek dawn a. He’ng thawktute hian vanduaina tawka COVID-19 an lo vei a, nunna an chan phah a nih chuan ralna atan cheng nuai nga (Rs 5 lakh) zel pek tura ruahman a ni bawk. IndianOil hian COVID-19 beih nan PM CARES fund-ah oil company dangte nen tang hovin cheng vaibelchhe 1031-ah chhung lut a, hei bakah hian, thawktute ni hnih hlawh cheng vaibelchhe 61 an chhung lut bawk.

Lawngtlai District-ah hian IOCL hnuaia LPG dealer pali – Blue Mountain RGGLV Indane Agency, Sangau; Chhangte Indane Gramin Vitarak, Bungtlang ‘S’; Khuma Gas Agency, Lawngtlai leh Nutei RGGLV Indane Agency, Chawngte P te an awm a. Petrol pump pakhat – MIZOFED, Lawngtlai a awm bawk.

IOCL District Nodal Officer chuan oil leh gas lak chungchangah online booking leh digital payment hmanga tih hram hram ni se an duh thu sawiin, hemi atan hian 7588888824-ah SMS/IVRS leh WhatsApp hmang te, IndianOilOne mobile app hmang emaw, cx.indianoil.in kal tlang emawa dawr thin tur leh @Paytm te hmang thin turin mipuite a chah.