Mizoram Chief Minister Pu Lal Thanhawla chuan 11.4.2012 nimin chawhnu khan Saiha District atangin Lawngtlai District a lut a. Chief Minister te nupa leh amah tawiawmtu Pu Zodintluanga, Minister i/c Sports, I&PR, UD&PA etc te, Pu R. Lalrinawma, Chairman, Mizoram Law Commission leh Pu R.L. Pianmawia, Dy. Chief Whip te hi Lawngtlai District ramri-a Kawlchaw ‘W’ ah District official pawimawh ten lo hmuakin Kawlchaw ‘W’ ah hian Public Meeting neih a ni a. Hemi hnuah hian Lawngtlai khua rawn panin Circuit House, Lawngtlaiah Chief Minister lo dawnsawnna leh lawmna hun hman a ni a; Pu B. Lalhmingthanga MCS, DC, Lawngtlai leh Pu C. Ngunlianchunga, CEM, LADC ten Chief Minister lawmna thu an sawi a ni.
Circuit House, Lawngtlaiah hian hun hmangin Lawngtlaia Sorkar department hotute leh tlawmngai pawl kalkhawmte hmaah Chief Minister chuan thu a sawi a. Rorelna dik, rorelna tha leh rorelna fel a awm theihnan mimal sahmim tihpuar tum lovin ram tan hna an thawk a ni a ti a. Sorkarin miretheite a ngaihsak a, an dinhmun chawikan leh mi rethei leh hausa inkar tih zim hi a tum a ni tiin mirethei te dinchhuah ve nan NLUP buatsaih a nih thu a sawi a. Thingtlang miten khawpuia pem kher ngai lova mahni khaw buzawlah theuh hlawhtlinna an lo hmuh theihna atan NLUP hi a pawimawh a ni a ti bawk. Chief Minister chuan tunlai khawvel hi thalaite khawvel a nih thu sawiin infiamna lamah nasa taka thalaite hruai turin hma an la a ni a ti a. Infrastructure tha kan mamawh ang te kan nei chho tan a, North East Games te pawh hlawhtling taka thlengin 1-na kan ni tih a sawi lang. Zirna lamah hma kan sawn a, technology-ah kan thang a ni tiin NIT te, IIMC leh IIM te Mizoramah zir tan a ni ve ta a ti a. IIHM (Hotel Management) zirna tur pawh ruahman mek a ni a ti a; Thenzawlah NIT tan ram 300 acre ruahman a ni tawh a ti bawk. Mizo thalai tam zawk sipaia luh a that zia a sawi bawk a ni.
Chief Minister chuan India Look East Policy avangin Lawngtlai District hi sumdawnna hmunpui a la ni dawn a ni a ti a, mipuite’n an thinlung an lo buatsaih lawk a pawimawh a ti bawk. Hmasawnna chi hrang hrang atan Sorkarin hma a la a, hengte hi a puitlin theihnan Mizorama mipuite hian neitu nihna rilru kan put a ngai a ni a ti a. Mipui thlan lal te hi democracy ramah chuan an lal ber a ni tiin Mizoram chhunga cheng hnam tinin a te zawnga inlakhrana rilru hran pu lovin Mizoram hi kan zavaia kan ram a ni tih hre reng ang u, a ti bawk a ni.
