Coronavirus Disease (COVID-19) hri danna (vaccine), "Covishield" chu vawiin khan Lawngtlai District-a hriselna lam kaihhnawiha thawktu (healthcare worker)-te hnenah pek chhuah tan a ni a. Lawngtlai East bialtu MLA, Agriculture Development Board Vice Chairman ni bawk Pu H. Biakzaua hovin a pek tanna hun hman a ni.

Vaccine pek chhuah hmaa inkhawm tawi buatsaih, Lawngtlai Bawrhsap Dr Andrew H. Vanlaldika kaihhruaiah Lawngtlai East bialtu MLA Pu H. Biakzaua chuan COVID-19 hri danna pek chhuah theih a ni ta chu lawmawm a tih thu a sawi a. Sawrkarin theih tawp a chhuah avang te, tlawmngai pawl, kohhran leh mipui tawiawmna leh thawh hona tha tak avang te'n Mizoram chu hri dona kawngah India rama a ti tha ber pawl a ni tih sawiin, Lawngtlai District pawh a thawk tha berte zinga mi nia a hriat thu a sawi a. Vaccine chu inven himna tangkai tak a nih a beisei thu sawiin, fimkhurna erawh thlahthlam phah lo turin District mipuite chu a chah a ni.

He hunah hian LADC-a Executive Member leh MDC te leh sawrkar official thenkhat bakah, hri danna la tur healthcare worker-te an tel a. District Immunisation Officer leh COVID-19 vaccine pek chhuahna Supervisor Dr S. Thaizi chuan report pein, Chief Medical Officer Dr LP Malsawma'n lawm thu sawina hun a hmang bawk.

Hri danna hi District Hospital Lawngtlai building tharah pek nghal niin, Medical Officer i/c Covid Care Centre Dr Elsadai B. Lalbersiama chu pek hmasak ber a ni a. A thawh khatnaah hian Lawngtlai District-a healthcare worker mi 1,132 pek tura tih a ni a. Session khatah mi 100 chauh pek theih niin, vawiin a hawn ni-ah hian session khat kalpui a ni a, a vaiin mi 100 hnenah hri danna hi pek rih phawt a ni. Hri danna hi dose hnih (2) lak tur niin, ni 28 hnuah a tum hnihna hi lak leh tur a ni.