93/2024-2025 

2024 Ṭau thla ni 8: Election Commission of India (ECI)-in Lok Sabha Inthlanpui, 2024 lo awm tura vote thlak tura polling station pan thei lo tur (absentee voter) - upa kum 85 chung lam (senior citizen) leh vohbik (person with disability - PwD)-te tana postal ballot hmanga mahni in chhung luma vote thlak theih dan (home voting) a ruahman angin Lawngtlai District chhunga assembly bial pathumah vawiin aṭang khan absentee voter-te'n postal ballot hmangin vote an thlak ṭan.

In lama vote thlak tur absentee voter-te vote thlaktir turin 36-Tuichawng leh 37-Lawngtlai West bialah mobile polling team pakhat ve ve leh 38-Lawngtlai East bialah mobile polling team pahnih siam a ni a. He'ng mobile polling team-te hian vawiin aṭang khan Lawngtlai District chhunga kum upa leh vohbik mahni in lama vote thlak turte chu an inah kal chilhin postal ballot hmangin vote an thlaktir a. Home voting hi April ni 13, 2024 (Inrinni) thlenga kalpui tura ruahman a ni.

Tuichawng bialah home voting dil 23 (senior citizen vek), Lawngtlai West bialah home voting dil 22 (senior citizen vek) leh Lawngtlai East bialah home voting dil 99 (senior citizen 95 leh PwD 4) an awm a. Lawngtlai District-ah a pum puiah home voting dil 144 (senior citizen 140 leh PwD 4) an awm a ni.

He'ng bakah hian Lawngtlai District aṭangin essential service aṭanga postal ballot-a vote thlak dil 26 awm bawkin, an zinga mi pasarih chu Lawngtlai District chhunga vote nei (Lawngtlai West - 2 & Lawngtlai East - 5) an ni a. Essential service absentee voter-te tan hian Lawngtlai DC Conference Hall, Sangau BDO Office leh Chawngte SDO (C) Office-ah te postal ballot hmanga vote thlakna hmun buatsaih niin, April ni 8 aṭanga April ni 10 chhungin chawhma dar 10 leh chhun dar 12 inkarah vote thlak theihna hun hawn mek a ni bawk.