Lawngtlai District Bawrhsap Pi Shashanka Ala, IAS hma laknaa Lawngtlai District chhunga Project Nutrition Garden, “Kan Sikul, Kan Huan” kalpui tur Phase-I chu sikul, anganwadi centre leh naupang enkawlna hmun hrang hrang 214-ah nimin, July ni 13, 2019 (inrinni) khan hawn a ni.

He project-in a tum ber chu bazar-a mi lei ngai lova sikul, anganwadi centre leh naupang enkawlna hmun te’n an mamawh thlai hrisel leh thianghlim an intodelh theih nana an sikul bula thlai hmun siamtir leh chumi kal tlanga naupangte’n an taksa mamawh khawp ei tur tha kum tluana an dawn theihna tur leh mahni intodelh tura hna thawh dan an thiam theih nana zirtir a ni a. Line department hrang hrang - DC, Education, Social Welfare, RD, Soil, Agriculture, Horticulture, KVK leh sikul zirtirtute leh naupangte thawh honaa hma lak tur niin, zirtirtute pawh hemi chungchangah hian training pek vek tawh an ni. 

Project bul tanna atan hian Lawngtlai District chhunga primary school 38, middle school 78, high school 35, anganwadi centre 59, child care institute 3 leh SSA residential hostel 1, a vaiin institution 214 thlan chhuah phawt a ni a. He'ng phase-I hnuaia zirna in thlan chhuahte hian an sikul bulah square fit 100 vela zau thlai hmun tur a remchan dana buatsaihin, Project bul tanna atan hian thlai chi 5 – antam, bean, behlawi, bawrhsaiabe leh tomato chi te sem phawt a ni a. Nimina a hawnna hi Lawngtlai DC Pi Shashanka Ala bakah, department hrang hranga officer eng emaw zat chuan chan insemin hmun hrang hrangah an hmanpui hlawm a, he hunah hian project chungchang inzirtir nawn leh a nih bakah, thlai chi te pawh thlak/tuh nghal a ni.