2505/2023-2024

Lawngtlai dated 26th October 2023: Vawiin chhun dar 12 atang khan Lawngtlai district-a inthlan chhung a Polling Station hrang hrang a duty tur, Polling Official-te tan Postal Ballot hmang a Vote thlakna hun chu Facilitation Centre, Govt. Regional Higher Secondary School, New Vengpuiah hawn a ni.

District Election Officer, Lawngtlai District thuchhuah tarlan danin Polling Official-te tan hian Postal Ballot hmang a vote thlak hun hi ni 26 atang a ni 28, October 2023 chhun dar 12 atang a tlai dar 5 thleng hawn a ni ang a. October ni 31 atang a November ni 6 chhung hian Polling Station-a duty tur ni lo, Election Official dangte tan Facilitation Centre, Deputy Commissioner’s Office-ah Postal Ballot hmang a vote thlak hun buatsaih a ni bawk ang.

Vawiin vek hian Govt. Regional Higher Secondary School, New Vengpuiah vote thlak ni a Polling Station a mawhphurhna hrang hrang nei, Polling Official-te tan training buatsaih a ni a. Pu Vanlalmuana, BDO, Bungtlang South leh Pu Samuel Lalmalsawma Sailo, SDC-ten zirtirna pein Electronic Voting Machine sawngbawl kawng a hriattur hrang hrangte an entir bawk a ni.

Lawngtlai district-ah hian Polling Station 181 awmin 36-Tuichawng AC ah Polling Station 70, 37-Lawngtlai West AC ah Polling Station 69 a awm a. 38-Lawngtlai East AC ah Polling Station 42 a awm bawk a ni. October ni 4, 2023-a Electoral Roll tlangzarh tak ah khan 36-Tuichawng Assembly Constituency-ah voter 36042 an awm a, 37-Lawngtlai West ah voter 29493 awmin 38-Lawngtlai East ah voter 25904 an awm a. Voter awm zat atang a 45685 chu mipa an ni a, 45754 chu hmeichhia an ni.