Nimin khan Lawngtlai District chhungah tluang tak vote thlak a ni a, chawhnu lam dar 3:00Pm thlenga vote tla zat hriat theih chin chu 56.99 % niin, report dawn mai theih lohna Polling Station engemawzat a awm bawk.

Lawngtlai District-ah hian Polling Station 159 awmin MLA Constituency bial pathum Tuichawng, Lawngtlai West leh Lawngtlai East te a huam a. Zing lamah Lawngtlai College Veng South Polling Station-ah engmaw harsatna tenau thlen vanga vote thlak tan hun a khawtlai hlek tih mai loh chu harsatna dang a awm thu hriat a nilova, he thu ziahlai thleng hian he Polling Station-ah hian vote 365 a tla leh tawh a ni.

Chawhnu lam dar 3:00 Pm thlenga MLA Constituency Wise-a vote tlak dan Percent Report, District Election Control Room-a dawn theih chin chu hetiang hi a ni. Tuichawng A/C ah 62.98%, Lawngtlai West A/C ah 59.15% leh Lawngtlai East A/C ah 48.83% a ni a, a vaia lakkhawmin 56.99% a tla tihna a ni. Vote thlak hun hi tlai lam dar 5:00 Pm thleng hawn tur a ni a, vote thlak hun khar a nih ve leh Polling Party te hian Lawngtlai an rawn pan pui nghal anga; District Election Office a Strong Room-ah dahluh nghal tur a ni.

Heng Polling Party te lo dawng sawng tur hian Receiving Counter pathum siam niin engkim peihfel a ni tawh a ni.