Vawiin chawhnu dar 2 vel khan, Pu Buansanga, kum 34, Lawngtlai a Fire and Emergency Service Department a Driver chu Chhimtuipui Ferry kaiah chesualin a boral a. He chhiatna thu hi hriat a nih ve leh Lawngtlai District Bawrhsap Pu J. Hmingthanmawia chuan a Officer Disaster changtu chu chhiatna hmunah tir nghalin ruang zawngtute mamawh tur bungrua engemaw zat a ken tir nghal.

Vawiin chawhnu lam khan Pu Buansanga leh a thawhpui thenkhatte chu Chhimtuipui Ferry kai tia hriat lar, Saiha leh Lawngtlai inkal pawhna kawngpui hnai zawkah hian an Department tui mamawh chawi turin an kal a. He lai hmun hi Lawngtlai khawpui chawm nana thal laia tui chawina hmun lun ber a ni nghe nghe. Thu dawnna in a sawi danin tui an thal zo chu inchiah dai turin luiah hian an chenga, vanduai thlak takin Pu Buansanga hi a chesual ta a ni.

Chhiat tawh thu hi hriat a nih ve leh Bawrhsap chuan Pu Vanlalchhuana, MCS, SDC Lawngtlai, Disaster Management changtu chu a hmunah tir thla nghalin Life Boat pahnih, Life Jacket engemawzat leh Silpauline te a ken tir bawk.

Pu Buansanga hi Cheural lam khawchhuak niin a hnathawhna Lawngtlaiah hian Fire and Emergency Service Department Quarters ah a nupui leh a fate pathum ten nen an cheng a. A ruang hi Cheural panpui tur ni a sawi a ni.