2681/2023-2024

Lawngtlai, dated 6th November 2023: November ni 7, 2023 a inthlanpui neih tur General Election to Mizoram Legislative Assembly, 2023 atana Lawngtlai District 36-Tuichawng Assembly Constituency chhung Jarulsury Polling Station-a duty tur phurtu lirthei chu Udalthana 1 bul, Chawngte atanga Km 20 vel a hlaah vanduaina tawkin a chesual. Lirtheiah hian Driver bakah Polling Official mi 4 leh Security Official mi 2 te an chuang a, chuang zinga mi Pu Z.Lalmuanzuala, Constable, 4th IR Bn, Luangpawl, Mamit chuan vanduaithlak takin nunna a chan a ni.

Chetsual thu hriat a nih veleh Pu Joseph H.Lalramsanga, Deputy Commissioner, Lawngtlai District chuan Superintendent of Police, Returning Officer, Nodal Officer leh District Hospital hotute thutkhawm ko nghalin,  he hunah hian a ṭul anga hmalak dan tur hrang hrang sawiho nghal a ni a. A hmuna kal turin Morgue Van tirh nghal niin, an chetsual dan kimchang zirchiang turin Sector Magistrate tirh nghal a ni bawk. Sawrkar Dan dinglai anga chhiat tawkte tan a zangnadawmna awm theite pawh sawiho nghal niin hliam tuarte enkawl zui dan tur rel nghal a ni a. Ruahmanna siam anga Lawngtlai District-a inthlanna kalpui chhunzawm a nih theih nan zanin ṭhutkhawm chuan Jarulsury Polling Station-a duty thlaktu tur a ruahman nghal a; zanin vek khan an duty-na tur hmun an pan nghal a ni.

Pu Joseph H.Lalramsanga, Deputy Commissioner, Lawngtlai District chuan MLA inthlanna tihlawhtling tura kal chhuakten chhiat an tawk leh nunna channa hial a thleng chu pawi a tih thu sawiin, vanduaina tawk chhungkuate  thinlung taka a tawrhpui thu a sawi a. Sawrkar anga chhawmdawlna leh chhiat tawhna chungchanga hmalak ṭulte chak taka bawhzui turin ṭhutkhawma telte a chah nghal bawk.

Lirthei chesualah hian Pu Z.Lalmuanzuala bakah hian Pu J.Ramluahpuia, Presiding Officer, Pu Bobby Lalrintluanga, Asst. PRO, Pu Franky VL Hmangaiha, Polling Official, Pu T.Vanlalnghaka, Polling Official leh Pu Lalduhzuala, 3rd MAP te chuangin lirthei hi Pu Riangdina'n a khalh a, vanneihthlak takin hliam na lutuk tuar an awm lo ni a hriat a ni.