372/2026-2027

Lawngtlai, 5th May 2026 : Vawiin khan Lawngtlai District Disaster Management Committee chuan Pu Donny Lalruatsanga, bawrhsap leh Chairperson, District Disaster Management Authority nibawk kaihruaiin DC Office Chamber-ah thutkhawm an nei.

Pu Donny Lalruatsanga chuan Commitee Member leh sawmbikte hnena lawmthu sawina a nei a. Furpui lo thleng mai turah inbuatsaihna tha tak neih a tul tih tarlangin, theihtawpa hmalak zel a nih tur thu a sawi a. Tun dinhmunah chhiatna lo thlen thulha biakpawhna tur Incident/ Zonal Officers - te ruatfel tawh niin, QRT, SDRF leh District Emergency Operation Center (24 x7) te pawh an inrâlring reng tih sawiin, mipuite chhawr tangkai turin a ngen a. Mahni In leh lo, tui hawk luankawr leh leimin theihna hmun te chu ven fimkhur zual a tul tiin, mit lên a ngaihven reng a tul hle a ti a. Bawrhsap chuan State Sorkar department hrang hrang, LADC leh NGOs- te inkarah thawhhona tha a awm zel a pawimawh hle tih tarlangin, DDMA chuan theihtawp a chhuah zel tur thu a tarlang bawk.

Thutkhawmah hian thil pawimawh tak tak sawiho a ni a. Zonal Officers - te chu an mahni huamchhunga chhiatna a lo thlenin, a hmunah kalin mumal taka report siamin, a tul angin hma lo la thin se an ti a. Leimin vanga 'Road Block' awm thei a nih angin, line department leh hnathawk mektu Company- te chu a rang lama chechhuak turin lo inrâlring reng se, ruahmanna felfai tak lo siam se tih a ni. Quick Response Team (QRT) - te tangkai zawka chhawr ni se, a tul angin training- te pawh neih tir leh ni se an ti a ni. Chhiatna lo thlenin, 3rd IR Battalion - a SDRF (State Disaster Response Force) te an tangkai thin hle tih pawm tlangin, Furpui lo thleng turah englai pawha chechhuak thei tura ruahmanna siam tawh a ni chu thlamuan thlak an tih thu ngaihthlak a ni.

KMMTTP kawngpuia 'Road Block' awmfo thin chu a rang lama tihtlang thin ni se tih niin, hemi kawngah hian MPWD leh Company - ten chak zawkin hma lo la thin se an ti a. Chhiatna lo thlen thulha chechhuak thei tur, tlawmngaia inpe theite training pekna pawimawh tak 'Aapda Mitra Volunteers' chu kalpui chhunzawmin, tha taka training - pek ni se an ti a ni. Furpui lo thleng mai turah line department hrang hrangte inbuatsaihna tha tak a pawimawh hle tiin, a bik takin hmanrua chi hrang hrangte hman tlak leh hman theih tura lo endik/ enfiah sa vek ni se an ti a. Chhiatna lo thlen thulhah sawrkar leh NGO - te thawhhona tha a pawimawh hle tih pawm tlangin, thawhhona tha awm tura hmalak chhunzawm zel ni se an ti bawk a ni.

Vawiin thutkhawmah hian Lawngtlai District Disaster Management Committee Member- te, NHIDCL, PMPL leh ABCI  aiawhte an telkim tha hle a, Pu Donny Lalruatsanga chuan lawmthu sawiin hun a khar.