1218/2026-2027

Lawngtlai, 29th June 2026 : Special Intensive Revision (SIR) 2026 kalpui mekah vawiin khan Lawngtlai District Election Officer (DEO) Pu Donny Lalruatsanga kaihhruaiin DC Conference Hall-ah 'Enumeration Phase' thlirletna leh hmalak chhunzawm zel dan tur sawihona neih a ni.

Pu Donny Lalruatsanga chuan kalkhawmte hnena lawmthu sawina a nei a. SIR kalpui mekah Election Officials, BLOs, Asst. BLOs,BLAs leh Supervisors- te inpekna fakawm a tih thu sawiin, hmalam hunah theihtawp chhuah zel turin a chah a. Tun dinhmunah Lawngtlai District- a Assembly Constituency pathumah 'digitization' zawhfel tawh niin, hun tiam chhunga zawh a nih kawngah mawhphurtute inpekna fakawm a tih thu a tarlang a ni. DEO chuan July ni 4, ah Draft Roll- tlangzarh a nih tur thu sawiin, chumi hnuah 'Claims and Objection' kalpui nghal a ni ang a ti. SIR 2026 tha leh felfai taka kalpui turin hmalam hunah tihtur tam tak a awm tih sawiin, Pu Donny Lalruatsanga chuan hemi kawnga mawhphurhna neite theihtawp chhuah zel turin a chah nghal bawk.

Pu Collin Hlychho, Election Officer, chuan SIR kalpui mekah report tlangpui pekna a nei a. Report atanga a lan danin, Lawngtlai District - ah Vote nei 95,564 awmin, Enumeration Form digitized - 90,699 niin, Uncollectable - 4,865 an awm a ni. Uncollectable bikah hian - Death - 1,710; Untraceable/ Absent - 1,118; Permanently Shifted - 1,701; Already Enrolled - 317; leh Others- 19 an awm a ni.

Thutkhawmah hian SIR 2026 kalpui zel tura hmalakna tura tul hrang hrangte sawiho a ni a. Claims & Objection - neih turah fimkhur taka kalpui ni se, Vote nei thei dik tak chauh chuang tura theihtawp chhuah ho ni se an ti a. A bik takin insawifiahna hun neih hunah VC leh NGOs- te an pawimawh dawn hle tih pawm tlangin, dik taka hmalak ho ni se an ti a. SIR 2026 - ah ECI thuchhuak ang zela hmalakho zel ni se an ti bawk a ni.

Vawiin thutkhawmah hian EROs; AEROs; DIPRO;  President,General Secretary,Teasurer CYLA; Vice President MJA Lawngtlai;  LWA, MHIP, MUP, LUP - aiawh, leh  Kohhran aiawhte an tel thei a, Pu Donny Lalruatsanga chuan lawmthu sawiin hun a khar.