4191/2025-2026

Lawngtlai, 28th January 2025: Vawiin khan Lawngtlai District Fire Prevention Committee chuan an Chairman leh Bawrhsap nibawk Pu Donny Lalruatsanga hovin a Office Chamber-ah thutkhawm an nei.

Pu Donny Lalruatsanga chuan kal khawmte hnena lawmthu sawina a nei hmasa a. Thal lo thleng leh mai tur a nih angin kangmei chhuak thei lakah fimkhur a tul hle a ti a. Kangmei chhuakin chenna In, rawmngaw tichhiain, nunna hial chan theih a ni a, fimkhur kawngah mitinin mawhphurhna an nei a ni, a ti. LAO, LADC ten lo hal hun felfai tak an siam tawh chu lawmawm a tih thu tarlangin, department hrang hrangten mawhphurhna an neihte hlen theuh turin a chah a. VC - te pawimawhna tarlangin, aurinna hmanga tam thei ang ber au thin turin a chah bawk a ni. Bawrhsap chuan kangmei ven kawngah Lawngtlai District- chu Mizoram District dangte entawn tlaka siam a pawimawh tiin, Committee Member, NGOs, Kohhran leh Lawngtlai mipuite theihtawp chhuahpui turin a sawm nghal bawk.

Thutkhawmah hian kangmei laka inven dan tur bakah kangmei chhuak lo tura inzirtirna neih chungchang sawiho a ni a. VC - tinte hnenah lehkha pek a, kangmei laka fimkhur tura a tam thei ang bera aurinnaa au tir ni se an ti a. MJA- zingah kangmei laka fimkhur kawnga ziak thate hnenah lawmman pek ni se tih a ni a. CYLA- ten thuchhuah siamin, YLA Branch- tinah pek ni se an ti bawk a ni. Ram tikangtu lakah ka taka hremna kenkawh ni se an ti a. Fire hydrant - dah belh chu pawimawh hle nia an hriat thu tarlangin, hmalak ni se an ti a ni. Zirna In, VC, leh NGO - te hnenah 'Awareness Campaign' kalpui ni se, Lawngtlai kawtchhuahah thuziak tar ni se an ti a. Commercial Vehicle - ah 'sticker' tar tura hmalak ni se tiin BDO tin ten an huamchhungah hma lo la se an ti bawk a ni.

Vawiin thutkhawmah hian Lawngtlai Distrcit Fire Prevention Committee Member- te an telkim tha hle a, Pu Donny Lalruatsanga chuan lawmthu sawina neiin hun a khar.