Vawiin khan Lawngtlai DC Conference Hall-ah video conference hmangin JIPMER Puducherry leh District Hospital Lawngtlai inkara "Telemedicine Facility" hawn a ni.

Vawiina Telemedicine Facility hawnna hunah hian JIPMER Director Prof. Dr SC Parija chu Khuallian niin, JIPMER Puducherry hmunah hian Lawngtlai Bawrhsap Dr Arun T., IAS chuan hawnna hun hi a hmanpui a. Lawngtlai lamah District Medical Superintendent Dr Lalmalsawmi Hmar chuan hawnna hun kaihruaiin, JIPMER Puducherry atangin Khuallian Prof. Dr SC Parija chuan video conference kal tlangin a rawn hawng a ni.

Telemedicine Facility hawnnaah hian Khuallian Prof. Dr SC Parija chuan India ram kilkhawr taka telemedicine facility hawn a nih theihna tura ngaihtuahna sengtu Lawngtlai Bawrhsap leh District Hospital Lawngtlaia thawktute thahnemngaihna ropui a tih thu leh lawmawm a tih thu a sawi a. He facility hi mipuite'n tangkai taka an hman ngei a beisei thu a sawi.

Lawngtlai Bawrhsap Dr Arun T., IAS chuan Mizoramah pawh district hnufual leh kilkhawr pawl Lawngtlaia tunlai khawvel changkanna chhawr tangkai a, JIPMER te nena telemedicine facility hawn a ni thei ta chu lawmawm a tih thu sawiin, Lawngtlai mipuite tan medicine lama rahbi thar, hriselna kawnga sang taka hlang kaitu a nih a beisei thu a sawi.

Vawiina telemedicine facility hawnnaah hian Dr Isak Lallawmkima, GDMO, District Hospital, Lawngtlai chuan presentation hmangin telemedicine chungchang a sawi fiah a. Election Officer Pu Lalrinawma MCS pawhin thu a sawi bawk.

JIPMER hi India rama damdawi in lian leh damdawi lam zirna hmun lian leh hlun berte zinga mi a ni a. Tunah hian khawvel ram hrang hrang pasarihah telemedicine facility branch hi an hawng tawh a. Telemedicine hi India hmarchhakah hian NEIGRIHMS, Shillong-ah chiah a la awm a, Lawngtlai hi a pahnihna tur a ni.

Telemedicine facility hmang hian mipuite'n District Hospital kal tlangin phai lama kal kher ngai lovin phai doctor leh mi thiam zawkte an rawn thei dawn a. District Hospital-a doctor-te'n anmahni pantute dinhmun leh harsatnate chu he facility kal tlang hian JIPMER-a doctor-te nen sawi tlangin, an inrawn tawn thin dawn a ni.