Tunlai hian Lawngtlai District Hospital chu OPD building sak tharah an insuan lut mek a. Vawiin khan Lawngtlai DC Dr A. Muthamma IAS chuan he damdawi in thar hi a tlawh.

DC hi damdawi in thuneitute'n lo dawngsawngin, damdawi in hi an lo fanpui a. DC chuan room leh ward hrang hrang tlawhin, tul leh mamawh tur awm ang te a en fiah a. Damdawi in thawktute hnenah hian damdawi in tihchangtlun zel nana hma lakna tur hrang hrangte a sawipui bawk.

Lawngtlai District Hospital-ah hian khum 27 awmin, khum 50 awm thei tura tihlen tum mek a ni a. Building thar hi OPD building atana sak niin, tuna building hlui dinna hmunah hian damdawi inpui sak thar tur a nih avangin he OPD building hi a puma luah lailawk rih tur a ni.