ATMA Lawngtlai District buatsaih ni hnih awh District Level Agricultural Exhibition (Kisan Mela) chu vawiin khan Lawngtlaia Dokulha Hall-ah LADC-a Agriculture changtu Executive Member Pu C. Sangchhunga hovin khar a ni.

Pu C. Sangchhunga chuan ATMA-in exhibition a buatsaih chu lawmawm a tih thu sawiin, thil pho chhuahte chu Lawngtlai District-ah thei leh thlai tha tak tak a thar ve theih a ni tih lantirtu a nih thu a sawi a. Kut hna thawktute thawh rah chu mi dang cho phurtu leh rim zawka hna thawh duhtirtu a nih ngei a trin thu a sawi. Agriculture chu mihring mamawh bulpui innghahna a nih avangin thlahthlam lova uar deuh deuh a tul thu sawiin, agriculture department leh an thawhpui department dangte chu Lawngtlai District tana nasa leh zuala thawk zel turin a chah nghal bawk.

Exhibition kharna hun hi Lawngtlai District ATMA Project Director, Lawngtlai DAO Pu J. Rokima’n a kaihruai a. Exhibition-a endiktu Lawngtlai DHO Pu L. Lalhmingmawia Pachuau leh Lawngtlai DVO Dr B. Zonghinga te bakah, District Sericulture Officer Pu R. Lalbiakthanga leh Asst Fishery Officer Pu H. Rothangpuia te pawhin thu an sawi a. Exhibition result puan leh lawmman sem a nih hnuah ATMA Accountant Pu Zothansanga’n lawm thu sawiin hun khar a ni.

He Kisan Mela-ah hian thei leh thlai leh thil deh chhuah dang chi 43 pho chhuah niin, item tinah hian lawmman a hran theuhva siam a ni a. Hei bakah hian, Queen of the Show-ah Lawngtlai Florist Association te pangpar pho chhuah Princettia chu thlan niin, King of the Show-ah BCM M. Kawnpui te coconut chu thlan a ni a. Block pali zinga lawmman pakhatna 16 leh pahnihna 15 latu Lawngtlai Block chu Best Block-ah thlan niin, Best Department Stall-ah Sericulture Department stall chu thlan a ni.