245/2026-2027

Lawngtlai, 23rd April, 2026 : Vawiin khan Lawngtlai District Level Committee on 'Gyan Bharatam Mission' chuan DC Conference Hall-ah thutkhawm an nei a. Pu Donny Lalruatsanga Lawngtlai bawrhsap leh Chairman, 'Gyan Bharatam Mission' nibawk chuan a kaihruai.

Pu Donny Lalruatsanga chuan Committee Member kalkhawmte hnena lawmthu sawina a nei a. Gyan Bharatam Mission hnuaiah hnam ziarâng leh tihphung bakah sakhuana lam thlengin kutziaka awmt kum 75 aia upate vawnthat kalpui a nih tur thu sawiin, hemi kawngah hian sawrkarin theihtawp a chhuah tur thu a tarlang a.Hman laia thil thleng, a thleng ngei a ni tih hriatna pawimawh tak chu kutziak a awm thin hi a ni tiin, chutiang ziaka awmte vawn that chu thilpawimawh tak a ni, a ti. A bik takin Mizoramah kan Pi leh puten hnam ziarâng leh kalphunga an lo nei thin ziaka awmte zawn chhuah leh vawn that chu a tul hle nia ahriat thu tarlangin, sawrkar bakah pawl leh mimal ang pawha hmalak a tul dawn hle a ni, a ti. Bawrhsap chuan hnam ziarâng leh kalphung kutziaka awmte zawnchhuah chu ram leh hnam hmangaintute tan tih makmawh a ni tiin, Manuscript - tha leh hlu tak tak zawngchhuak tura theihtawp chhuah turin Commitee Member - te leh Lawngtlai mipuite a sawm nghal bawk.

Pu Lalmuanpuia, SRO, District Art and Culture Office Lunglei chuan 'Gyan Bharatam Mission' nihphung tlangpui sawizauna a nei a. Kum 2025 Independence Day- a Prime Minister thusawi bawhzuina niin sawrkarlaipuia, Ministry of Culture chu Nodal Deparment an ni, a ti a. Mizoram bikah chuan Art & Culture Department - chu Nodal Agency an ni a ti. Gyan Bharatam Mission- in a tum ber chu India rama kum 75 aia upa manuscript awm ang angte zawn chhuaha, digitised a, tunlai thiamna leh Artificial intelligence - te hmangtangkaia a mamawhtute tana chhawpchhuah a ni, a ti. Paper, savun, lung, copper emaw Iron leh thil danga kutziaka awm, a lo berah kum 75 chunglam te chu zawhchhuah leh vawn that tura hmalak a nih tur thu a tarlang a. Tun dinhmunah India ramah manuscript - nuai sawmruk pakhat aia tam vawnthat a nih tawh thu tarlangin, Mizoram ah chuan sawmhnih pariat vel a a awm a ni, a ti. Gyan Bharatam Mission- chu thla thum chhung kalpui tura ruahman a ni tiin, hemi chhung hian ngawrh taka survey kalpui a ni ang a ti bawk. Gyan Bharatam Mission- hnuaiah hian 'mobile app' siam niin, he application kaltlanga hian thlalak dah luh theih a a nih thu a tarlang a ni.

Thutkhawmah hian thil pawimawh tak tak sawiho a ni a. Lawngtlai District- ah 'Gyan Bharatam Mission' mumal taka kalpui tha ti tlangin, Lawngtlai District chhunga kum 75 chunglam manuscript - awm ang angte zawnchhuah hna chu chak zawka kalpui ni se an ti a. District Nodal Officer -cum- District Coordinator atan Additional Deputy Commissioner ruat niin, Assistant Nodal Officer atan LADC leh CADC - a Art & Culture Officer - te ruat an ni. Lawngtlai District- a Manuscript awm theihna - Library, Archives, Zirna In, Kohhran leh mimal zawnchhuah hna chu District Nodal Officer leh Assistant Nodal Officer - te kutah dah a ni a. Gyan Bharatam Mission- chungchang inzirtirna leh inhrilhhriatna chak taka kalpui ni se an ti a, Executive Secretary, LADC leh CADC henah lehkha pek ni se, a tul angin anmahni huamchhngah hma lo la se an ti bawk a ni.

Vawiin thutkhawmah hian Lawngtlai District Level Committee on 'Gyan Bharatam Mission' te an tel kim tha hle a, Pu Donny Lalruatsanga chuan lawmthu sawina neiin hun a khar.