613/2026-2027

Lawngtlai, 20th May  2026 : Vawiin chhun dar 1:00  PM khan DC Conference Hall - ah 'Lawngtlai District Level Task Force on Immunization'  chuan an Chairman leh Bawrhsap nibawk Pu Donny Lalruatsanga kaihhruaiin thutkhawm an nei.

Pu Donny Lalruatsanga chuan member kalkhawmte hnenah lawmthu a sawi a. Natna darh tur ven kawngah te, thihna tihlem kawngah te, Naupang hriselna thleng kawngah leh mipui nawlpui tana hriselna thazawk thlen turin a hun taka mumal taka Vaccine - lâk a pawimawh tak zet a ti a. A bik takin   Lawngtlai District chu a zauin khua pawh a tam hle a,  inkalpawhna kawng a tha lo leh thawktu indaih lohna lo awm bawk nen immunisation- ah sang a har hle a,chutih rualin theih tawpa hmalak a ngai a ni, a ti. Lawngtlai District chhunga cheng mipuiten hriselna tha zawk an neih theihna tur leh natna hrik umbo kawngah theihtawp chhuah zel a nih tur thu tarlangin, District Administration - chuan chak zawka hmalak a lak zel tur thu a sawi bawk.

Thutkhawmah hian Dr.Remlalnghaki, DIO chuan April 2025 - March 2026 chhunga Lawngtlai District - a Immunization kalpui dan tlangpui tarlanna a nei a. Report atanga a lan danin, Routine Immunization Coverage - ah Bualpui NG chu 115.3 % niin a sang bera, Vaseitlang 39.4 % chu a hniam ber an ni thung a ni. MR1 Vaccine  - ah Bualpui NG 115.4 % niin a sang  ber a, Bungtlang 39.1 % niin a  hniam ber a, MR2 Vaccine- ah  Borapansury 115.6 % niin a sang ber a, Vaseitlang 74.4 % niin a hmiam ber thung  a ni.  HPV Vaccine - ah hian Lawngtlai District - ah Target-  1181 awmin Vaccine la - 499 an awm a ni. National Immunization Day - chu 1st Round, 1st July 2026 leh 2nd Round - 23rd September 2026 ah hman tur a ni a, hetah hian Lawngtlai District - ah Vaccine pek tur Target - 12,140 a awm a ni.

Pu James Zarzoliana, STS  hnen atangin NTEP kalpui dan tlangpui ngaihthlak a ni a. Kum 2026 bikah TB patient - 50 awmin Thi - 2 an awm a ni. Ni 24, March 2026  - 19th May 2026 chhung khan 'TB Mukt Bharat Abhiyaan' kalpui niin, Vulnerable Screened - 1833, X- Ray Screened - 1442, leh  NAAT tested - 123 kalpui niin, MTB- 0 a ni.

Thutkhawmah hian thil pawimawh tak tak sawiho a ni a. RI, MR1, R2 leh  HPV Vaccination- ah hlawhtlinna tan tak awm tawh mahse,  tan lak thar a tul hle tih pawm tlangin, theihtawp chhuah chhunzawm zel ni se an ti a. A bik takin HPV Vaccination - ah Target - 1181 awmah Vaccine la mi - 499 chauah an awm chu a tawklo hle tih pawmin, hemi bik atan hian theihtawp chhuaha hmalak thar ni se an ti a ni. 1st July leh 23rd September 2026- a National Immunization Day hman tura Sawrkarlaipuiin ruahmnna a siam chu Lawngtlai District- ah pawh hman ve ngei ni se an ti a. Hemi Ni denchhena naupang Kum - 5 hnuailam  Vaccine pek tur Target - 12,140 awm chu tihhlawhtlin ngei ni se tiin, hemi atan hian ruahmanna felfai tak siam  ni se an ti bawk a ni.

Bawrsap Pu Donny Lalruatsanga chuan kalkhawmte chungah  lawmthu sawiin thutkhawm  a khar a ni.