No.3388/2019-2020

Mizoram sawrkarin COVID-19 vanga inkharkhip laia ram chhung mipuite thlai thar mamawh pe chhuak tura thlai thar lak khawm leh sem chhuah dan tur (vegetable supply chain) a ruahman angin, Lawngtlai District-ah chuan Bawrhsap kaihhruaina hnuaiah District Level Task Force-in ruahmanna siamin, Lawngtlai Horticulture Division chuan thingtlang atangin thlai thar an phur khawm a, vawiin atang khan veng hrang hrang local level task force hnenah an sem chhuak.

He vegetable supply chain-ah hian Horticulture Department chu Nodal Department an ni a. March ni 27 (Zirtawpni) khan Lawngtlai Horticulture Division-a officer leh staff-te chuan hna chanpual insemin an bawhzui nghal a. Lawngtlai District chhunga thingtlang khaw hrang hrang - Ngengpuikai, Kawlchaw W, Chawntlangpui, Thingfal, Nalbonya, Sumsilui leh Udalthana bakah, Lunglei District-a Khawmawi atang te'n thlai thar hi an phur khawm a. Tuna an phurh khawm hi kar khat tla tur niin, pick up trip 6 a ni a, a vaiin quintal 90 bawr vel a ni.

Lawngtlai District-a vegetable supply chain atan hian sum che vel (revolving fund) atan District Administration atangin Rs 1,50,000/- leh Horticulture Department atangin Rs 1,00,000/-, a vaiin Rs 2,50,000/- hmangin bul tan a ni a. Department hian thingtlanga lo neitute thlai thar chu he sum hmang hian lei khawmin, local task force-te'n veng chhunga hralh turin Horticulture Department atang hian a hlawmin an la chhawng ve leh thin dawn a ni.

Mipuiin an mamawh ang zelin heti ang hian tih chhunzawm tum a ni a. Lawngtlai Horticulture Division hotute chuan District chhungah thlai thar lak tur hi a la awm tha rih viau niin an sawi.