4662/2025-2026

Lawngtlai, 2nd March 2026: Vawiin chawhnu dar 1:00PM khan DC Conference Hall - ah Lawngtlai District Level Vibrant Village Programme - II (VVP-II) member-te an thukhawm a, Pu Donny Lalruatsanga, District Bawrhsap chuan kaihruaiin Lawngtlai District chhunga VVP-II kalpui dan tur relho a ni a. Pu C. Lalsawmzuala, Chief Executive Member, LADC chuan a telpui.

Pu Donny Lalruatsanga chuan kalkhawmte hnena lawmthu sawina a nei hmasa a. Vibrant Village Programme phase - I, chu 2023 ah tan a nih tawh thu a tarlang a. VVP chu India ramri hrula khaw awmte chawikanna tura ruahmanna niin, khaw pilril lutuk nia an inngaihna atanga kawng hrang hranga hmasawnna thlentir a, khaichhuah tumna a ni, a ti. Sawrkar laipuiin kalpui tura a tih ang taka kalpui a pawimawh hle tih a sawi. Bawrhsap chuan VVP- II ah chuan sawrkar hnathawk te’n an dawhkan atanga hnathawh tur an ruahman ang ni lovin khaw neitu VC leh tlawmngai pawl kalkhawmte ngeiin anmahni khaw mamawh leh tha an tih an thlang dawn tiin, heihian rah tha a chhuah ngei a beisei thu a tarlang a. Bawrhsap chuan khaw thlanchhuahah kum 5 chhung atan nuai 300 hman tur a nih angin, theihtawp chhuah turin mawhphurtute a chah nghal bawk.

Pu C. Lalsawmzuala chuan VIbrant Village Programme chu mimal taka a ngaihpawimawh thu a sawi a. A bik takin ramri hrula khua awmte chawikan an nih chuan hmasawnna lian tak a thlen a beisei tih a tarlang a. District Administration leh LADC- te inkarah lungrual taka thawhhona tha a awm zel a ngai a ni, a ti. CEM chuan VVP- II bikah LADC - ten tangkaina an neih kawng hrang hrangah theihtawp an lo chhuah tur thu a sawi bawk a ni.

Pu H. Zonunmawia, Member Secretary leh Project Director, DRDO nibawk chuan chuan report tawi pekna a nei a. Lawngtlai District- chhungah khaw 40 thlanchhuah niin, khaw pakhat tan kum khatah cheng nuai 300 ruahman a nih thu a tarlang a ni. BDO theuh ten ruahmanna an neihte chu Committee - in a pawmpui a ngaih thu sawi bawk.

Thutkhawmah hian BDO, Sangau, BDO Lawngtlai, BDO Bungtlang 'S' leh BDO Chawngte ten VVP- II hnuaia ruahmanna an neihte ngaihthlak niin, Line department atangin zawhna leh chhanna hun hman nghal a ni a. BDO ten ruahmanna an neihte hi thlitfim leh tur a ni a. Thutlukna hi tahrik ni 9, March, 2026 ah siam ni se an ti a ni.

Vawiin thutkhawmah hian Lawngtlai District Level Vibrant Village Programme - II (VVP-II) member-te an telkim tha hle a,  Chairman Pu Donny Lalruatsanga chuan lawmthu sawina neiin hun a khar.