No.1669/2021-2022

Lawngtlai, Thlazing ni 2, 2021: Lawngtlai District Magistrate Dr Andrew H. Vanlaldika chuan vawiin khan thupek chhuahin, COVID-19 laka mipuite him zawk nana Lawngtlai khawpui chhunga curfew puan mek chu ni 09.08.2021 (Thawhtanni) zan 7:00 thleng hman turin a pawt sei.

District Magistrate thu chhuahin a tar lan danin, curfew pawh sei a nih chhung hian a hnuaia inkaihhruainate hi zawm tur a ni:

1. Hemi hun chhung hian pawn chhuah leh inlen pawh khap tlat a ni. Building khata in hrang hrang luahte pawh intlawh pawh khap a ni.

2. Dawr zawng zawng (damdawi zawrhna tih loh chu) khar vek tur a ni.

3. Chhiat ni/that ni chu YLA-te ruahmannain kalpui tur a ni ang a. Chhungkaw lamin a tel thei tur list (mi 30 aia tam lo) siamin, YLA/Police/VLTF hnenah an pe ang a. Anniin list-a telte chauh an kal a ni tih an enfiah ang.

4. District Administration, H&FW Dept leh Police Dept te chu mamawhna avangin an zavaiin an kal thei ang. State sawrkar office dang leh LADC office-ah te chuan HoO/HoD leh peon pakhat (1) an kal ang a, hna tul zual thawk tur an mamawh dan azirin HoO/HoD-te'n VLTF hriatpuinain an ko thei ang. An hming leh motor no. te DC office-ah an pe tel tur a ni.

5. Kohhran office-te chu hna hmanhmawh leh tul zual thawk turin mi pathum (3) aia tam lo an kal thei ang. Office kal turte hian detailment order chu VLTF/Police/Executive Duty/Flying Squad te enfiah theih turin an keng tur a ni. Mi pathum aia tam kal a tul thut a nih chuan VLTF-te hriatpuinain an ko thei ang.

6. Loh theih lohva bank dawr mamawhte tan VLTF phalna lain, Thawhtanni, Thawhlehni leh Nilaini-ah te Lawngtlai khaw chhunga awmte tan bank dawr theih a ni ang a, khaw pawn lam tan Ningani leh Zirtawpni-ah te dawr theih a ni thung ang.

7. Mamawh ngawih ngawih nei leh chhuanchham mai turte chu an veng VLTF-te hnenah an in-report ang a, VLTF-te'n an lo buaipui ang.

8. Lawngtlai town pawn lama awmte tan an mamawh ngawih ngawih thilte chu an VLTF-te hnenah an report ang a. VLTF member pathum (3) aia tam lovin Bazar VLTF/Chandmary VLTF leh Market Monitoring Committee hriatpuinain an bazar-sak thei ang.

9. Lo lam hna thawk/feh turte chu VLTF phalna lain zing dar 8:00 hmain an chhuak ang a, tlai dar 5:00 – dar 6:00 inkarah an let leh hman tur a ni.

10. Hma sawnna hna thawh, chhiatna thleng palh thei thil a awm avanga loh theih lohva kalpui ngai a awm chuan Zonal Officer-te kal tlangin District Magistrate phalna lak hmasak tur a ni ang.

He thupek hian a hnuaia tar lante hi a huam lo vang:

1. Covid-19 Official duty-te.
2. Medical duty-te.
3. Magistrate, Police leh Home Guard duty-te.
4. Zonal Officer-te.
5. Flying Squad-te.
6. Executive Duty-te.
7. VLTF member duty-te.
8. Market monitoring team member-te.
9. Chanchinbu mite, Cable TV leh Internet Provider-te.
10. ASF avanga DVO leh DCVO (LADC) hnuaia duty-te.
11. Fire & Emergency service duty-te.
12. PHE, PWD & P&E Dept hnuaia emergency duty-te.
13. Disaster Management hna thawktute leh DC leh LADC hnuaia Quick Response Team-te (chhiat rupna lo thlen palhah).
14. MSACS hnuaia Drop-in Centre.
15. Mizofed filling station leh Mavula filling station.
16. Medical emergency leh thihna avanga chhuah ngai, veng VLTF lehkha kengte.
17. Bungraw load leh unload-te.
18. Sanitation, LADC hnuaia thawktute (bawlhhlawh paih dawnin).
19. Bank hna thawkte.
20. FCS&CA Dept-a hna tul zual thawk turte leh, driver buhfai phurte (an challan nun hun chhung atan).
21. District Magistrate leh Sub Divisional Magistrate te'n tul bik thila phalna an pekte.

He thupek hian thu leh a awm a nih loh chuan puan a nih atangin ni 09.08.2021 zan dar 7:00 thleng a huam ang a. A zawm lote chu IPC section 188-na leh The Mizoram (Containment and Prevention of the Spread of COVID-19) Act, 2020 hmanga hrem an ni ang.