No.1469/2021-2022

Lawngtlai, Vawkhniahzawn thla ni 19, 2021: Lawngtlai District Magistrate Dr Andrew H. Vanlaldika chuan vawiin khan thupek chhuahin, COVID-19 laka mipuite him zawk nana Lawngtlai khawpui chhunga curfew puan mek chu ni 26.07.2021 (Thawhtanni) zan 7:00 thleng hman turin a pawt sei.

District Magistrate thu chhuahin a tar lan danin, curfew pawh sei a nih chhung hian a hnuaia inkaihhruainate hi zawm tur a ni:

1. Hemi hun chhung hian pawn chhuah leh inlen pawh khap tlat a ni. Building khata in hrang hrang luahte pawh intlawh pawh khap a ni.

2. Dawr zawng zawng (damdawi zawrhna tih loh chu) khar vek tur a ni.

3. Chhiat ni/that ni chu YLA-te ruahmannain kalpui tur a ni ang a. Chhungkaw lamin a tel thei tur list (mi 30 aia tam lo) siamin, Police/VLTF/YLA hnenah an pe ang a. Anniin list-a telte chauh an kal a ni tih an enfiah ang.

4. LADC office kal dan tur chu a tul dan angin GAD, LADC-in ruahmanna a siam ang.

5. State sawrkar hnuaia office kal dan turah, District Administration leh Medical staff-te chu mamawhna avangin an zavaiin an kal thei ang a. Office dangah te chuan Head of Office leh peon te an kal ang a, hna tul zual thawk tur an mamawh dan azirin HoO-te'n VLTF hriatpuinain an ko thei ang.

6. Loh theih lohva bank dawr mamawhte tan VLTF phalna lain, Thawhtanni, Thawhlehni leh Nilaini-ah te Lawngtlai khaw chhunga awmte tan bank dawr theih a ni ang a, khaw pawn lam tan Ningani leh Zirtawpni-ah te dawr theih a ni thung ang.

7. Mamawh ngawih ngawih nei leh chhuanchham mai turte chu an veng VLTF-te hnenah an in-report ang a, VLTF-te'n an lo buaipui ang.

8. Lo lam hna thawk/feh turte chu VLTF phalna lain zing dar 8:00 hmain an chhuak ang a, tlai dar 5:00 – dar 6:00 inkarah an let leh hman tur a ni.

9. Hma sawnna hna thawh, chhiatna thleng palh thei thil a awm avanga loh theih lohva kalpui ngai a awm chuan Zonal Officer-te kal tlangin District Magistrate phalna lak hmasak tur a ni ang.

He thupek hian a hnuaia tar lante hi a huam lo vang:

1. Covid-19 Official duty-te.
2. Medical duty-te.
3. Magistrate, Police leh Home Guard duty-te.
4. Zonal Officer-te.
5. VLTF member duty-te.
6. Chanchinbu mite, Cable TV leh Internet Provider-te.
7. ASF avanga DVO leh DCVO (LADC) hnuaia duty-te.
8. Fire & Emergency service duty-te.
9. PHE, PWD & P&E Dept hnuaia emergency duty-te.
10. Disaster Management hna thawktute leh DC leh LADC hnuaia Quick Response Team-te (chhiat rupna lo thlen palhah).
11. Mizofed filling station @AOC leh Mavula filling station @Siaha road.
12. Medical emergency leh thihna avanga chhuah ngai, veng VLTF lehkha kengte.
13. Bungraw load leh unload-te.
14. Sanitation, LADC hnuaia thawktute (bawlhhlawh paih dawnin).
15. Bank hna thawkte.
16. FCS&CA Dept-a hna tul zual thawk turte leh, driver buhfai phurte (an challan nun hun chhung atan).
17. District Magistrate leh Sub Divisional Magistrate te'n tul bik thila phalna an pekte.

He thupek hian thu leh a awm a nih loh chuan puan a nih atangin ni 26.07.2021 zan dar 7:00 thleng a huam ang a. A zawm lote chu IPC section 188-na hmanga hrem an ni ang.

Attachment

  • Loading attachment...