Nimin khan Lawngtlai District Magistrate, District Bawrhsap ni bawk Pu J. Hmingthanmawia chuan tunlaia vawk natna leng mek Viral Disease Porcine Reproductive and Respiratory Syndrome (PRRS) chungchangah Lawngtlai District mipuite zawm tur khapna thupek a hnuai ami ang hian a siam.

Mizoram sawrkar AH & Vety Department thuchhuak in a tarlan danin tunlai hian Mizoram chhungah Vawk natna Viral Disease Porcine Reproductive and Respiratory Syndrome (PRRS) a leng tih hriat a ni a. He Vawk natna hi Mizorama a awm nachhan ber nia hriat chu Myanmar atanga vawk lakluh vang a ni.

Chuvangin Section 144 Cr.Pc 1973 in thuneihna min pek angin leh Lawngtlai District chhunga mipuite he Vawk natna PRRS laka an lo him theih nan a hnuai thupek hi ka chhuah e. 1. Myanmar atanga vawk lakluh leh zawrh khap a ni.

2. Natna avanga Vawk thi reng reng uluk tak leh thuk taka phum vek tur a ni.

3. Ran talh tur reng rengin Veterinary Doctor hriattir hmasa in ran hrisel an talh ngei a ni tih finfiahna lehkha an nei ngei tur a ni.

He thupek bawhchhia leh pawisa lo te chu Section 188 IPC dan hmanga hrem an ni ang. He thupek hian thuleh awm hma chuan chhuah a nih atanga thlahnih chhung a huam ang.